Zhduket anija me tre persona në Skoci, gjendet trupi i njërit prej anëtarëve

Roja Bregdetare Britanike tha se ishte njoftuar për zhdukjen e një anijeje, e cila po lundronte pranë portit të Nessit, në ishullin Lewis, rreth orës 21:20 të së martës.

Policia e Skocisë tha se ishte njoftuar për ngjarjen rreth orës 23:35. Sipas policisë, në bord të anijes ndodheshin tre burra, ndërsa trupi i njërit prej tyre është gjetur.

Familjarët e personave të përfshirë janë njoftuar dhe po marrin mbështetjen e nevojshme nga efektivët e policisë.

Agjencia Detare dhe e Rojës Bregdetare (MCA) bëri të ditur se në operacionin e kërkimit janë përfshirë një avion i Rojës Bregdetare, dy helikopterë të saj, gjashtë ekipe shpëtimi të Rojës Bregdetare, dy varka shpëtimi të Institucionit Mbretëror Kombëtar të Varkave të Shpëtimit (RNLI), një anije lokale dhe Policia e Skocisë.

RNLI tha se në operacion ishte angazhuar edhe varka e saj e shpëtimit për çdo kusht atmosferik, me bazë në Lochinver.

Operacioni i kërkimit po zhvillohet në një kohë kur rajoni është nën një paralajmërim të verdhë për erëra të forta.

Zyra Meteorologjike Britanike (Met Office) ka lëshuar paralajmërimin për periudhën nga ora 10:00 deri në orën 19:00 sipas orës lokale, për disa zona të Malësisë Skoceze dhe Ishujve Perëndimorë, ku në disa vende priten erëra deri në 70 milje në orë (rreth 113 km/h).