Sadleva Bodo është emëruar drejtoreshë e Përgjithshme e Burgjeve, pas dorëheqjes së Adriatik Kupit, i cili e mbajti këtë detyrë për shtatë muaj.
Vendimi është marrë nga Këshilli i Ministrave, me propozimin e ministrit të Drejtësisë. Sipas vendimit, Adriatik Kupi lirohet nga detyra, ndërsa Sadleva Bodo emërohet në krye të Drejtorisë së Përgjithshme të Burgjeve.
Bodo mban aktualisht edhe detyrën e këshilltares së drejtorit të Byrosë Kombëtare të Hetimit.
Ndryshimi në drejtimin e institucionit vjen pas një serie lëvizjesh në këtë post. Gjatë 13 viteve të fundit, Drejtoria e Përgjithshme e Burgjeve ka pasur nëntë drejtues, nga Artur Zoto deri te Adriatik Kupi.
Vendimi për emërimin e Sadleva Bodës hyn në fuqi menjëherë dhe botohet në Fletoren Zyrtare.
