Opinionisti Albatros Rexhaj ka komentuar zhvillimet e fundit në drejtësinë shqiptare, duke u ndalur te kryeministri Edi Rama, çështja e Belinda Ballukut dhe mënyra se si, sipas tij, po funksionon drejtësia e re në Shqipëri.
Rexhaj u shpreh se është bërë i njohur për qëndrimet e tij në mbrojtje të Belinda Ballukut, ndërsa kritikoi mënyrën se si ndërtohen dhe trajtohen çështjet nga organet e drejtësisë.
“Pra foli budalli, bëhet zhurmë dhe kjo zhurma bëhet fakt dhe fakti trajtohet si kushedi se çka dhe hajd të merremi ne tashi me këtë punë. Kjo është ‘drejtësia e re evropiane’”, u shpreh Rexhaj.
Sipas tij, kryeministri Edi Rama ka shqetësime lidhur me veprimtarinë e drejtësisë, por kjo nuk do të thotë se ai i druhet një arrestimi. Rexhaj deklaroi se Rama nuk është një person që merr para, megjithëse ngriti si problem mënyrën se si delegohet besimi te bashkëpunëtorët.
“Edi Rama nuk është njeri që merr pare apo që ka marrë pare së paku që kur u bë kryeministër, më herët s’di çka bërë, se unë se mbaj mend”, deklaroi ai.
Duke folur për mundësinë e një goditjeje nga drejtësia ndaj kreut të qeverisë, Rexhaj theksoi se shqetësimi i Ramës lidhet me atë që ai e cilësoi si përdorim politik të institucioneve të drejtësisë.
“Edi Rama nuk ka brengë se mund të arrestohet se nuk ka çka, por e ka stres këtë punë sepse një prokuror atje mund me vazhdue me bërë goditjet politike”, tha Rexhaj.
Në këtë kontekst, ai solli si shembull rastin e Belinda Ballukut, duke e cilësuar goditjen ndaj saj si politike. Rexhaj vlerësoi gjithashtu figurën e Ballukut dhe marrëdhënien e saj me qytetarët.
“Për shembull goditja ndaj Belinda Ballukut ishte puro politike, Belinda është grua e mirë, u është gjendur njerëzve afër, unë kam pas raste me analizu më tepër kohët e fundit dhe e kuptoj pse njerëzit e duan”, u shpreh ai.
Gjatë intervistës, Rexhaj komentoi edhe vizitën e ambasadorit amerikan në SPAK, duke argumentuar se bashkëpunimi i Shteteve të Bashkuara me institucionet shqiptare të drejtësisë nuk duhet interpretuar domosdoshmërisht si mbështetje për çështje politike.
“Por s’ka qenë për dosje politike, por për dosje të krimit të organizuar”, deklaroi ai.
Rexhaj shtoi se, Shtetet e Bashkuara e konsiderojnë qeverinë shqiptare një partnere, duke kundërshtuar narrativat që e paraqesin atë si të lidhur me krimin.