Gjykata e Posaçme i kërkon KLGJ-së të përcjellë te Ministria e Drejtësisë dhe Kuvendi nevojën për ndërhyrje ligjore. Mes propozimeve është edhe përfaqësimi i magjistratëve në organet drejtuese të Dhomës së Avokatisë.
Gjykata e Posaçme kundër Korrupsionit dhe Krimit të Organizuar (GJKKO) kërkon ndryshime ligjore për të parandaluar bllokimin e proceseve gjyqësore për shkak të bojkotit kolektiv të avokatëve.
Përmes një shkrese drejtuar Këshillit të Lartë Gjyqësor (KLGJ), gjykata propozon që nevoja për ndërhyrje ligjore t’i përcillet Ministrisë së Drejtësisë dhe Kuvendit të Shqipërisë, me qëllim garantimin e zhvillimit të rregullt të gjykimeve dhe mbrojtjen efektive të të drejtave të individëve.
Në kërkesën e saj, GJKKO identifikon dy drejtime kryesore ku, sipas saj, nevojiten ndryshime. Së pari, propozohet përcaktimi i rregullave të qarta ligjore që parandalojnë ndërprerjen e proceseve gjyqësore për shkak të mosparaqitjes kolektive të avokatëve. Së dyti, kërkohet përfaqësimi i magjistratëve në organet drejtuese të Dhomës së Avokatisë, mbi bazën e parimit të paritetit dhe reciprocitetit institucional.
Sipas Gjykatës së Posaçme, avokatia ka përfaqësim në organet e qeverisjes së sistemit të drejtësisë, ndërsa gjyqtarët dhe prokurorët nuk përfaqësohen në strukturat drejtuese të Dhomës së Avokatisë. GJKKO argumenton se vendimmarrjet e këtyre organeve mund të ndikojnë drejtpërdrejt në zhvillimin e proceseve gjyqësore dhe në garantimin e mbrojtjes së detyrueshme.
Në relacionin shoqërues të kërkesës, Gjykata e Posaçme thekson se e drejta e protestës është një liri themelore, por ushtrimi i saj duhet të jetë në përputhje me ligjin, parimin e proporcionalitetit dhe të drejtat e personave të tjerë.
Sipas argumentimit të gjykatës, thirrja për protestë kolektive drejtuar avokatëve nuk përbën grevë në kuptimin e legjislacionit të punës dhe, për rrjedhojë, nuk pezullon detyrimet profesionale të avokatëve ndaj klientëve dhe gjykatës.
GJKKO nënvizon se pjesëmarrja në protestë duhet të mbetet një zgjedhje individuale, duke përfshirë edhe të drejtën për të mos marrë pjesë.
Në këtë kuadër, gjykata vlerëson se mosparaqitja kolektive e avokatëve në seancat gjyqësore, kur bie ndesh me detyrimet profesionale dhe pengon garantimin e të drejtave të individëve, mund të mos jetë në përputhje me kërkesat e ligjshmërisë dhe proporcionalitetit. Shqetësim i veçantë, sipas saj, paraqesin çështjet që lidhen me lirinë personale.
Megjithatë, GJKKO sqaron se qëndrimi i saj lidhet me mënyrën e ushtrimit të protestës dhe pasojat që ajo sjell në proceset gjyqësore, pa cenuar të drejtën e avokatëve për të shprehur kundërshtimin e tyre përmes formave të tjera të ligjshme.
Në mbështetje të propozimeve, GJKKO i referohet jurisprudencës kushtetuese, sipas së cilës Dhoma e Avokatisë është një organizatë profesionale që funksionon në kuadrin e së drejtës publike, ndërsa profesioni i avokatit kontribuon në realizimin e një qëllimi publik dhe në administrimin e drejtësisë.
Gjykata sjell në vëmendje edhe ndalimin ligjor të grevës për magjistratët dhe kufizimet që parashikohen për administratën e sistemit të drejtësisë. Edhe pse këto ndalime nuk zbatohen drejtpërdrejt për avokatët, sipas GJKKO-së, ato dëshmojnë rëndësinë që ligjvënësi i kushton funksionimit të pandërprerë të drejtësisë si shërbim publik thelbësor.
GJKKO bën të ditur se ka marrë dhe do të vijojë të marrë masat e parashikuara nga legjislacioni në fuqi për të garantuar mbrojtjen efektive dhe zhvillimin e gjykimeve brenda një afati të arsyeshëm.
Megjithatë, sipas saj, masat ekzistuese duhet të plotësohen me garanci më të qarta ligjore, për të shmangur situatat që mund të pengojnë funksionimin e drejtësisë dhe të cenojnë të drejtat procedurale të individëve.
Kërkesa drejtuar KLGJ-së shoqërohet me një relacion analitik, ku shqyrtohen legjislacioni shqiptar, jurisprudenca vendase dhe ndërkombëtare, si dhe praktikat krahasuese që, sipas gjykatës, mbështesin ndërhyrjet e propozuara.