Presidenti i Republikës, Bajram Begaj, ka reaguar pas përshkallëzimit të tensioneve gjatë protestës së studentëve në Tiranë, duke u bërë thirrje të gjitha palëve për përgjegjësi, vetëpërmbajtje dhe respektim të ligjit.
Përmes një reagimi në Facebook, kreu i shtetit theksoi se e drejta për protestë paqësore është një nga themelet e demokracisë dhe se shteti ka detyrimin ta garantojë atë. Megjithatë, ai nënvizoi se dhuna nuk mund të jetë mënyrë për të shprehur pakënaqësinë, ndërsa përdorimi i forcës nga policia duhet të respektojë ligjin dhe parimin e proporcionalitetit.
“Presidenti i Republikës ndjek me shqetësim përshkallëzimin e tensioneve gjatë protestave dhe u bën thirrje të gjitha palëve të veprojnë me përgjegjësi e vetëpërmbajtje. E drejta për protestë paqësore është themel i demokracisë dhe detyrim i shtetit për ta garantuar. Por dhuna nuk mund të jetë mjet i shprehjes së pakënaqësisë, as përdorimi i forcës nga policia nuk duhet të dalë jashtë kufijve të ligjit dhe proporcionalitetit”, thuhet në reagimin e Begajt.
Presidenti theksoi gjithashtu rëndësinë e përgjegjësisë dhe respektimit të Kushtetutës e ligjit nga të gjitha palët, pa përjashtim.
“Në këtë moment, vendit i duhet më shumë përgjegjësi. Kushtetuta dhe ligji duhet të mbeten kufiri i të gjithëve, pa përjashtim. Mbetem i gatshëm të dëgjoj të gjitha shqetësimet. Zyra ime është dhe do të mbetet e hapur për çdo të ri e çdo qytetar që dëshiron të shprehet, të dialogojë dhe të kontribuojë për të mirën e vendit”, u shpreh kreu i shtetit.
Në përfundim, Begaj përsëriti gatishmërinë për të dëgjuar shqetësimet e të rinjve dhe qytetarëve, duke vënë theksin te dialogu dhe respektimi i institucioneve si rrugë për të kapërcyer tensionet.