Një 36-vjeçar në Augsburg të Gjermanisë është dënuar me 13.500 euro gjobë dhe heqje të patentës së shoferit, pasi pengoi për rreth gjashtë kilometra një automjet të urgjencës mjekësore, duke vonuar me pesë minuta mbërritjen e mjekut te pacienti.
Sipas medias zvicerane 20 Minuten, që citon raportimet e mediave gjermane, ngjarja ndodhi në autostradën B17. Pavarësisht se automjeti i urgjencës po lëvizte me sirenën dhe dritat sinjalizuese të aktivizuara, shoferi nuk i liroi rrugën.
Në vend që të zhvendosej për t’i mundësuar kalimin ekipit mjekësor, 36-vjeçari vazhdoi të qëndronte përpara tij, duke shpërfillur sinjalet e urgjencës.
Sipas prokurorisë, burri dyshohet se e shfrytëzoi situatën për të përparuar më shpejt në trafik dhe për t’i hapur rrugë vetes.
I hiqet patenta, nuk mund të aplikojë për të paktën dy vjet
Gjykata e Qarkut në Augsburg e shpalli 36-vjeçarin fajtor për detyrim me forcë dhe pjesëmarrje në një garë të ndaluar me automjet.
Përveç gjobës prej 13.500 eurosh, gjykata vendosi t’ia heqë patentën e shoferit. Sipas vendimit, ai nuk mund të aplikojë për një patentë të re për të paktën dy vjet.
Dënimi financiar përbëhet nga 180 njësi ditore, me vlerë 75 euro secila.
Megjithatë, vendimi gjyqësor ende nuk është i formës së prerë.
Rasti ka rikthyer vëmendjen te detyrimi i drejtuesve të automjeteve për t’u liruar rrugën mjeteve të emergjencës. Çdo vonesë mund të ketë pasoja serioze, veçanërisht kur ekipet mjekësore po përpiqen të mbërrijnë te pacientë që kanë nevojë për ndihmë urgjente.