Përshkallëzohet protesta në Tiranë, disa grupe protestuesish shpërndahen nëpër lagje, një pjesë te Pazari i Ri

Protesta e nisur paraditen e së mërkurës përpara Ministrisë së Arsimit ka degjeneruar në akte dhune dhe vandalizmi ndaj disa institucioneve dhe bizneseve në kryeqytet.

Protestuesit janë zhvendosur përgjatë bulevardit “Dëshmorët e Kombit”, ku kanë ndezur zjarre pranë Kryeministrisë, në zonën e Piramidës dhe pranë Kullave Binjake.

Për shkak të tensioneve, policia ka përdorur gaz lotsjellës në përpjekje për të shpërndarë turmën, e cila më pas është zhvendosur në drejtim të Parlamentit.

Gazetari Ardit Hoxha raportoi se protestuesit janë shpërndarë në disa grupe në lagje të ndryshme të Tiranës, ndërsa një grup më i madh është zhvendosur në zonën e Pazarit të Ri.

Situata në kryeqytet mbetet e tensionuar, ndërsa protesta është shoqëruar me përplasje, zjarre dhe dëmtime të pronës.