Ekspertë vendas dhe ndërkombëtarë u mblodhën në Tiranë për të diskutuar aksesin në financim, digjitalizimin e sektorit financiar dhe rritjen e konkurrueshmërisë së kompanive shqiptare në tregjet ndërkombëtare.
Aksesi në financim, pasiguria gjeopolitike dhe transformimi digjital i sektorit financiar ishin në qendër të konferencës ndërkombëtare “Trade Finance and Factoring Conference 2026”, organizuar në Tiranë nga Dhoma Ndërkombëtare e Tregtisë për Shqipërinë (ICC Albania), në bashkëpunim me Bankën Evropiane për Rindërtim dhe Zhvillim (BERZH).
Aktiviteti bëri bashkë përfaqësues të bankave, institucioneve financiare dhe publike, si dhe ekspertë ndërkombëtarë, për të diskutuar instrumentet që mund të ndihmojnë bizneset shqiptare të zgjerojnë aktivitetin dhe të forcojnë pozitat e tyre në tregjet globale.
Pasiguria globale dhe digjitalizimi, sfida për sektorin financiar
Konferenca u hap me prezantimin e gjetjeve të raportit ICC Global Trade Intelligence Survey 2026, bazuar në një anketim me 100 ekspertë të sektorit bankar në nivel global.
Sipas rezultateve të paraqitura, pasiguria gjeopolitike dhe ndryshimet në politikat tregtare mbeten ndër shqetësimet kryesore të industrisë. Ndërkohë, transformimi digjital dhe automatizimi renditen mes pesë prioriteteve strategjike për rreth 75% të të anketuarve.
Në fjalën e mirëseardhjes, Hannes Takacs, drejtues i BERZH-it në Shqipëri, theksoi potencialin e financimit të tregtisë për zhvillimin e sektorit privat, duke nënvizuar se këto instrumente janë të rëndësishme jo vetëm për kompanitë e mëdha, por edhe për ndërmarrjet e vogla dhe të mesme.
Nga ana e saj, Ardita Seknaj, sekretare e përgjithshme e ICC Albania, vuri në dukje se Shqipëria përballet me shumë prej sfidave të evidentuara në nivel global. Sipas saj, nevojitet përshpejtimi i zhvillimit të instrumenteve financiare, digjitalizimi dhe përshtatja e tregut me nevojat konkrete të bizneseve.
Financimi i tregtisë dhe mbështetja për eksportuesit
Gjatë paneleve të diskutimit, ekspertët trajtuan rolin e bankave në lidhjen e Shqipërisë me tregjet ndërkombëtare, si dhe mundësitë që ofrojnë instrumentet e financimit për importuesit dhe eksportuesit shqiptarë.
Një vëmendje e veçantë iu kushtua financimit të tregtisë së gjelbër, zbatimit të standardeve ndërkombëtare dhe zhvillimit të zgjidhjeve financiare që mbështesin rritjen e qëndrueshme ekonomike.
Sipas të dhënave të Organizatës Botërore të Tregtisë, rreth 80–90% e tregtisë botërore mbështetet në forma të financimit të tregtisë, çka dëshmon rëndësinë e këtyre instrumenteve për funksionimin e zinxhirëve ndërkombëtarë të furnizimit.
Faktoringu, zgjidhje për likuiditetin e bizneseve
Një pjesë e veçantë e konferencës iu dedikua faktoringut, një instrument financiar që u mundëson kompanive të sigurojnë likuiditet duke marrë fonde për faturat e papaguara përpara afatit të zakonshëm të arkëtimit.
Ky mekanizëm mund të jetë veçanërisht i dobishëm për ndërmarrjet e vogla dhe të mesme, duke i ndihmuar të menaxhojnë më mirë kapitalin qarkullues, të financojnë porosi të reja dhe të zgjerojnë aktivitetin pa pritur pagesat nga klientët.
Zhvillimi i tregut të faktoringut dhe zgjerimi i aksesit në financimin e tregtisë u evidentuan si mundësi për të mbështetur rritjen e biznesit dhe për të përmirësuar aftësinë konkurruese të kompanive shqiptare.
Inteligjenca artificiale dhe automatizimi në shërbim të biznesit
Transformimi digjital ishte një tjetër temë kryesore e diskutimeve. Ekspertët shqyrtuan mundësitë e përdorimit të inteligjencës artificiale, automatizimit, dokumentacionit elektronik tregtar dhe bashkëpunimit mes bankave dhe kompanive fintech.
Këto zgjidhje synojnë të përshpejtojnë proceset financiare, të reduktojnë kostot dhe të lehtësojnë kryerjen e transaksioneve tregtare, duke krijuar mundësi të reja për bizneset që operojnë në një mjedis gjithnjë e më konkurrues.
Konferenca “Trade Finance and Factoring Conference 2026” shërbeu si një platformë dialogu mes sektorit financiar, institucioneve publike dhe komunitetit të biznesit, duke vënë në fokus nevojën për më shumë bashkëpunim, inovacion dhe akses në financim për të mbështetur zhvillimin e bizneseve shqiptare dhe zgjerimin e tyre në tregjet ndërkombëtare.
