Donald Trump ka shkaktuar indinjatë në rrjetet sociale pas publikimit të një videoje të krijuar me inteligjencë artificiale, ku presidenti amerikan shfaqet duke u përballur me një tigër dhe më pas duke e zbutur atë. Postimi u publikua në një kohë kur në internet po qarkullonin pamje të një incidenti fatal me një tigër në Britani.
Në videon e publikuar në platformën e tij Truth Social, Trump paraqitet teksa një tigër tenton ta sulmojë, por versioni i tij digjital arrin ta largojë kafshën, ta zbusë dhe të krijojë një marrëdhënie miqësore me të. Në sfond dëgjohet kënga “The Lion Sleeps Tonight”.
Publikimi u kritikua nga komentues të shumtë, të cilët e cilësuan videon të papërshtatshme, duke pasur parasysh ngjarjen tragjike që kishte ndodhur pak ditë më parë në Britani.
Sipas raportimeve të mediave të huaja, William Chapman, 24 vjeç, humbi jetën të shtunën pasi hyri në një zonë të rrethuar në parkun “Yorkshire Wildlife Park”, ku u sulmua nga një tigër siberian i quajtur Atai.
Pamjet e incidentit nisën të qarkullonin në rrjetet sociale, ndërsa familjarët e Chapman u kërkuan njerëzve të mos i shpërndanin më videot e ngjarjes.
Sipas raportimit, Trump kishte publikuar pamje reale të incidentit fatal përpara se të shpërndante videon e krijuar me inteligjencë artificiale. Krahas pamjeve të para, ai kishte shkruar: “Mos u tallni kurrë me natyrën! Presidenti DJT!”.
Publikimi i videos humoristike me tigrin, vetëm pak çaste më vonë, nxiti reagime të forta në internet.
Piers Morgan: Është jashtëzakonisht pa shije
Mes kritikëve ishte edhe gazetari britanik Piers Morgan, i cili reagoi në platformën X duke e dënuar publikimin e presidentit amerikan.
“Kjo është jashtëzakonisht pa shije. Fshije”, shkroi Morgan.
Ndërkohë, sipas raportimeve, Chapman kishte publikuar në rrjetet sociale disa fotografi dhe video në ditët përpara incidentit. Në njërën prej tyre, ai shfaqej duke hyrë në zonën e tigrit dhe duke iu afruar kafshës, e cila ndodhej mbi një platformë prej druri.
Ngjarja tragjike dhe qarkullimi i pamjeve në internet kanë rikthyer vëmendjen te përgjegjësia e përdoruesve të rrjeteve sociale në shpërndarjen e materialeve që lidhen me incidente fatale, si dhe te ndjeshmëria që duhet treguar ndaj familjarëve të viktimave.