Como e Cesc Fabregasit është mposhtur 3-2 në transfertë nga Feyenoordi, në ndeshjen e vlefshme për raundin e dytë të Champions League. Skuadra italiane kaloi e para në avantazh, por vendasit reaguan me shpejtësi dhe siguruan fitoren falë një goli të Hadj Moussa-s dhe një autogoli të portierit Robert Sanchez.

Como e nisi mirë takimin dhe zhbllokoi rezultatin në minutën e 18-të. Ramon shërbeu për Assane Diao, i cili u fut nga krahu i djathtë drejt qendrës dhe me një goditje të saktë me të majtën dërgoi topin në rrjetë. Gëzimi i miqve zgjati pak, pasi vetëm dy minuta më vonë Zechiel barazoi shifrat për Feyenoord, duke përfituar nga aksioni i Valentes.

Problemet për Fabregas vazhduan pak më pas, kur Diao u dëmtua dhe u detyrua të largohej nga fusha. Pjesa e parë u mbyll në barazim 1-1.

Në fillim të pjesës së dytë, trajneri i Feyenoordit, Giovanni van Bronckhorst, aktivizoi Diarra, i cili ndikoi menjëherë në lojë. Në minutën e 52-të, ai krosoi nga e majta dhe Hadj Moussa realizoi golin e përmbysjes, duke i dhënë avantazhin skuadrës holandeze.

Como tentoi të reagonte me zëvendësimet e Fabregasit, por në minutën e 81-të pësoi edhe golin e tretë. Hadj Moussa goditi nga jashtë zonës, topi u devijua, përplasi shtyllën dhe më pas shpinën e portierit Robert Sanchez, përpara se të përfundonte në rrjetë.

Në minutën e 93-të, Douvikas shënoi golin e dytë për Comon, por ishte tepër vonë për të shmangur humbjen.

Me këtë rezultat, Como mbetet me tri pikë, po aq sa Feyenoordi, që regjistroi fitoren e parë europiane të sezonit.