Emisioni “Stop” rikthehet te problematika e mjekëve dhe stomatologëve, e trajtuar disa herë në program, së fundi më 2 tetor 2026, pas përgjigjes së Njësisë Vendore të Kujdesit Shëndetësor lidhur me masat e marra ndaj punonjësve.
Sipas institucionit, pas transmetimit të muajit prill, janë marrë 24 masa disiplinore. Ndërsa, pas raportit të Drejtorisë Rajonale, Njësia Vendore e Kujdesit Shëndetësor ka vijuar me masa të tjera: 4 vërejtje me paralajmërim, 8 vërejtje, 2 masa administrative, si dhe 3 ndërprerje të marrëdhënieve të punës, shoqëruar me riorganizim të shërbimeve përkatëse.
Megjithatë, sipas informacioneve të siguruara nga “Stop”, nga tre rastet e ndërprerjes së marrëdhënieve të punës, dy punonjës kanë dhënë dorëheqjen, ndërsa një tjetër ka dalë në pension. Gjatë takimit me drejtoreshën e NjVKSH-së, kjo e fundit sqaroi se punonjësit kanë të drejtë të ndjekin procedurat për dorëheqje, edhe kur janë përfshirë në një raport kontrolli.
Një tjetër pikë e diskutueshme lidhet me verifikimet e kryera nga vetë njësia mbi punën e grupit të Drejtorisë Rajonale. Drejtoresha pretendon se disa prej konstatimeve të raportit nuk qëndronin dhe se punonjësit kishin qenë në vendet e tyre të punës. Por ky qëndrim vihet në pikëpyetje nga vëzhgimi i kryer nga emisioni “Stop”, kur punonjësit, sërish, nuk u gjetën në vendin e punës.
Drejtoresha mohon gjithashtu pretendimet për medikamente të skaduara dhe mungesë të pajisjeve sterilizuese në kabinetet dentare, duke iu referuar deklarimeve të punonjësve të pyetur.
Në këtë situatë, pavarësisht masave të raportuara, mbeten pikëpyetje mbi efektivitetin e kontrolleve, verifikimin e shkeljeve dhe zbatimin real të masave disiplinore.
———————
Shkolla “17 Shkurti”
Qytetarja: Ka aktualisht, apo ska?
Roja: Është, infermiere kemi, ça quhet ajo.
Qytetarja: Mjeke, po stomatologe keni?
Roja: Jo, s’kemi! E kam pa njëherë verës, po e kena kshu dhëmbësh, megjithëse merr rrogën këtu tek ne 100%, sepse s’e kam marr vesh situatën, se merr rrogën këtu, se thotë nuk kam kushte, s’ka… E kemi edhe klasën të gjitha, po ajo nuk vjen, kur marrin në telefon ata. Nuk vjen.
Shkolla “Luan Hajdaraga”
Qytetarja: Po doja të dija, a ka këtu mjek?
Roja: Deri tani, unë nuk e di. Vjet ishte, ka qenë nji. Doli në pension e nuk ka ardh më.
Qytetarja: E kuptoj! Po stomatolog?
Roja: Ta pyes drejtoreshën. Jo, jo, as stomatolog, jo, jo nuk e di, stomatolog, jo.
Qytetarja: Po mirë, se më dilte, që s’kishte as mjek, as stomatolog.
Roja: Po, nuk ka pas. Jo, nuk ka pas.
Shkolla “Klodian Tanushi”
Roja: Thjesht për dentiste?
Qytetarja: Eh, stomatologe, dentist.
Roja: Vjet ka pas, po sivjet s’e di.
Qytetarja: A ka, s’ka aktualisht stomatologe?
Mësuese: Nuk kemi neve stomatolog.
Shkolla “Azem Hajdari”
Roja: Infermierja vjen, infermierja,
Qytetarja: Po dentist? Ka dentiste?
Roja: Jo! S’ka! Këtu ka qenë një doktoreshë vjet edhe një kryeinfermiere më duket, se ajo doktoresha më duket, se ka ikur, ka vajtur në vënd tjetër, është vetëm kjo tani.
Shkolla “Tahir Sinani”
Roja: Në shkollë, këtu te shkolla jonë, nuk ka. Pse ka rregullore, që duhet të ketë dentist nëpër shkolla? Këtu nuk kemi.
Qytetarja: As dentist, as mjek?
Roja: Jo!
Shkolla “Jashar Hoxha”
Qytetarja: Aktualisht këtu ka mjek?
Roja: Është infermiere.
Qytetarja: Sa herë vjen?
Roja: Nuk e di fare.
Qytetarja: Po dentist, a ka?
Roja: Jo, dentist s’ka. Me sa di unë, jo, po…
Qytetarja: Po pra, po, e kuptoj.
/Emisioni STOP
