LIVE-Tirana në kaos, protestuesit djegin institucione shtetërore dhe private, policia hedh gaz lotsjellës

Burime bëjnë me dije se disa persona, pjesë të protestës janë shpërndarë në zonën e Qytet Studenti duke vazhduar me shaktërrimin dhe prishjen e sendeve përreth. Mësohet se nga këto dëme të shkaktuara janë edhe xhamat e thyer në disa prej godinave të Qytet Studentit.

Siç shihet në pamje, njëra nga godinat është ajo me numër 15 teksa shihen xhamat e thyer dhe godina me numër 12 që disa protestues sulmojnë me sende të forta ambientin.

Ambasada e Shteteve të Bashkuara të Amerikës në Tiranë ka reaguar sërish pas përshkallëzimit të protestave dhe përplasjeve të regjistruara në disa qytete të Shqipërisë.

Përmes një njoftimi zyrtar , ambasada ka paralajmëruar qytetarët për rrezikun e incidenteve të dhunshme, duke theksuar se protestuesit kanë përdorur mjete ndezëse, kanë hedhur gurë dhe kanë dëmtuar pronën publike e private.

Gjithashtu, ka paralajmëruar për bllokime rrugësh dhe ndërprerje të mundshme të shërbimeve publike, ndërsa u ka bërë thirrje qytetarëve të tregojnë kujdes për sigurinë personale.

Njoftimi i plotë i Ambasadës së SHBA-së në Tiranë:

“Demonstrata po zhvillohen në Tiranë, Shkodër, Durres, Vlorë, Korçë, Kukës dhe Elbasan, veçanërisht në qendrat e qyteteve dhe përreth ndërtesave qeveritare. Disa demonstrata janë shndërruar në të dhunshme. Protestuesit kanë përdorur mjete ndezëse, kanë hedhur gurë dhe kanë dëmtuar pronën publike dhe private. Demonstrata të tjera mund të ndodhin në ditët në vijim.

Demonstratat mund të përhapen në rrugët përreth, duke sjellë më shumë policë, ndërprerje të trafikut, devijime dhe mbyllje rrugësh. Ambasada e SHBA-së në Tiranë i ka thënë personelit të saj të shmangë të gjitha zonat e demonstratave.

Qëndroni vigjilentë dhe vendosni sigurinë tuaj personale në vend të parë. Monitoroni mediat lokale për informacionet më të fundit dhe ndiqni udhëzimet e autoriteteve lokale të zbatimit të ligjit.

Ndikimet e parashikuara:

Shërbimet Publike – Priten mbyllje të mëtejshme ose shërbime të reduktuara në të gjithë Shqipërinë, duke përfshirë transportin publik, zyrat qeveritare dhe shkollat.

Veprimet që duhen ndërmarrë:

Forconi qëndrimin tuaj të sigurisë duke praktikuar zakonet e mëposhtme:

Shmangni demonstratat.

Ji i vetëdijshëm për mjedisin përreth. Kufizo shpërqendrimet si telefonat ose kufjet në publik.

Monitoroni mediat lokale.

Gjithmonë keni një plan emergjence ose strategji daljeje.

Mbani një profil të ulët.

Gazetari i Euronews, Eni Ferhati, raportoi nga bulevardi “Dëshmorët e Kombit”, ku vijojnë tensionet mes protestuesve dhe policisë.

Ai bëri të ditur se forcat operacionale dhe policët civilë kanë nisur shoqërimet e protestuesve.

“Janë grumbulluar sërish protestuesit në bulevard. U krijua përshtypja se protesta u shpërnda, por protestuesit janë sërish në bulevard. Tentuan të afrohen pranë Kryeministrisë, por iu hodh gaz lotsjellës. Aty kaloi një automjet policie, ndërsa protestuesit e qëlluan me gurë. Kemi parë forcat operacionale, policë civilë, të cilët kanë filluar edhe shoqërimet e para. Pranë Ministrisë së Brendshme u shoqëruan dy persona. Ka pasur shoqërime edhe pranë Shallvareve. Ka thirrje nga protestuesit që të afrohen sërish te Kryeministria. Shumë prej tyre janë me maska, me ujë, me serume, të gjitha pajisjet për të përballuar reagimin e policisë. Nga ana e organeve ligjzbatuese kanë nisur hetimet në lidhje me pretendimet e policisë dhe pretendimet politike për këtë protestë”, tha ai.

Përfaqësuesi i Posaçëm i Asamblesë Parlamentare të OSBE-së për Europën Juglindore, Claude Haagen, ka shprehur shqetësimin mbi protestat e dhunshme në Shqipëri.

Përmes një reagimi, Haagen u ka bërë thirrje të gjitha palëve të tregojnë përmbajtje, të refuzojnë dhunën dhe të angazhohen në dialog paqësor. Ai ka theksuar se respektimi i shtetit të së drejtës, institucioneve demokratike dhe të drejtave të qytetarëve duhet të mbetet përparësi në një demokraci.

Reagimi i plotë:

“Si Përfaqësues i Posaçëm i Asamblesë Parlamentare të OSBE-së për Europën Juglindore, jam thellësisht i shqetësuar nga raportimet për protesta të dhunshme në Shqipëri.

Dhuna nuk ka vend në një demokraci. U bëj thirrje të gjitha palëve të tregojnë përmbajtje, të refuzojnë dhunën dhe të angazhohen në dialog paqësor.

Respektimi i shtetit të së drejtës, institucioneve demokratike dhe të drejtave të qytetarëve duhet të mbetet përparësi absolute.”

Pas më shumë se 12 orë protestë nëpër rrugët e Tiranës një numër jo i vogël protestuesish vijojnë të qëndrojnë në bulevardin dëshmorët e kombit ku herë pas herë tentojnë të afrohen drejt Kryeministrisë.

Policia është përgjigjur duke hedhur sasi të madhe gazi lotsjellës duke zmbrapsur protestuesit të cilët largohen dhe kthehen sërish pranë godinës së Kryeministrisë.

Kryenegociatorja e Shqipërisë në procesin e integrimit në Bashkimin Europian, Majlinda Dhuka, ka reaguar me një mesazh pas protestave që kanë përfshirë kryeqytetin. Ajo thekson se Bashkimi Europian është destinacioni i Shqipërisë, ndërsa u bën thirrje qytetarëve të ndërtojnë ura dialogu.

Mesazhi i plotë

“Bashkimi Europian është destinacioni ynë – Familja Europiane është përkatësia jonë çdo ditë, edhe sot!

Protesta dhe zëri i qytetarëve na kërkojnë të reflektojmë me përgjegjshmëri të lartë mbi Shqipërinë europiane që duam e po ndërtojmë me atdhetari, vendin ku zëri i qytetarëve dëgjohet, institucionet respektohen dhe shteti i së drejtës është mbi çdo interes.

Të jesh europian do të thotë të kesh guximin të ngresh zërin, urtësinë të respektosh ligjin dhe forcën të mos e kthesh dallimin në largësi mes nesh.

Paqja nuk është heshtje, as urtësia indiferencë. Ato janë forca për të mbrojtur vlerat europiane, respektin njerëzor dhe Shqipërinë.

Shqipëria i përket familjes europiane nga aspirata e të gjithë shqiptarëve, si dhe nga vlerat me të cilat zgjedh të jetojë çdo ditë.

Sot jemi më pranë se kurrë përmbushjes së aspiratës europiane mbi 30-vjeçare! Ky është një moment historik për të gjithë!

Së bashku, lutem, të ndërtojmë urat e DIALOGUT dhe çdo hap drejt Familjes së Përkatësisë – Bashkimit Europian!”, shkruan ajo.

Një situatë e tensionuar është krijuar mbrëmjen e së enjtes në zonën pranë Tajvanit, te Parku Rinia ku u zhvendosën një pjesë e protestuesve.

Policia ka tentuar disa herë të ndërhyjë për të shoqëruar protestuesit të cilët vazhdimisht kanë qëlluar me gur dhe sende të të forta në drejtim të efektivëve.

Ndërkohë, edhe policia ka hedhur gurë mbrapsht ndaj protestuesve, por është detyruar të zmbrapset.

Një protestues i lënduar gjatë protestës në Tiranë është paraqitur me pranga në Spitalin Universitar të Traumës, ku po marrin trajtim mjekësor edhe persona të tjerë të lënduar gjatë përplasjeve të ditës së sotme. I lënduari shihet gjithashtu i shoqëruar nga dy efektivë policie në krah.

Sipas njoftimit zyrtar të Qendrës Spitalore Universitare “Nënë Tereza” , në këtë spital nuk ka aktualisht persona të lënduar që po marrin trajtim mjekësor.

Ndërkohë, në Spitalin Universitar të Traumës janë trajtuar gjithsej 26 persona, mes tyre efektivë policie, protestues dhe kalimtarë të rastit.

E ftuar në një lidhje live në “Tonight” me Mirela Milorin ishte studentja Emi Meçani, e cila tha se kërkesa kryesore e studentëve protestues është dorëheqja e kryeministrit Edi Rama dhe zgjedhjet e parakohshme me një Kod të ri Zgjedhor.

“Kam qenë në protestë që ditën e parë dhe do të jem deri në ditën e fundit. Jemi të gjithë të lodhur, nuk mundemi më të jetojmë. Realisht, e gjithë jeta e Shqipërisë dhe e Tiranës po na mbyt të gjithëve, si studentë dhe si qytetarë. Ne kërkojmë dorëheqjen e kryeministrit dhe të kalojë vendi në zgjedhje elektorale me një Kod të ri Zgjedhor. Sepse nuk ka më sens për ne të ulemi me kryeministrin në një tavolinë me kërkesa që ne kemi tetë vjet që ia kemi kërkuar. I kemi kërkuar konvikte, bursa studimi, ushqim, stresim për studentët që vijnë nga rrethet. Jemi lodhur të gjithë duke shkuar atje, duke iu lutur atij të na i japë. Nuk ka më sens që ne t’i lutemi kryeministrit. Ne do të vazhdojmë derisa ai të japë dorëheqjen. Nëse ai nuk e jep dorëheqjen, jam e sigurt që situata do të përkeqësohet”, tha studentja Emi Meçani.

E pyetur nga moderatorja Mirela Milori nëse studentët do të krijojnë një formacion të ri politik, Meçani tha se nuk ka informacion në lidhje me këtë.

Pedagogu Ermal Hasimja tha në një intervistë për Euronews Albania se zgjidhja e vetme në situatën aktuale me protestën në Tiranë është dorëheqja e kryeministrit Edi Rama.

Sipas tij kryeministri Rama do ta përdorë dhunën e të rinjve gjatë 3 ditëve të protestës në Tiranë në favor të tij.

“Protestuesit kërkojnë dorëheqjen e kryeministrit dhe qeverisë, nuk mendoj se është aq e lehtë të anashkalohet me masa të tipit shkarkimi apo zëvendësimi i një ministri. Rama do t’i përdorë këto, është duke e vënë theksin te elementi i dhunës. Ajo që është zgjidhja dhe do ta qetësonte menjëherë situatën është dorëheqja. Kjo është e thjeshtë dhe nuk do të ishte rasti i parë, paçka se në Shqipëri apo jashtë, kur një kryeministër sheh që vendi rrezikon, për hir të paqes sociale mund të japë dorëheqjen, duke pasur parasysh se nuk janë 10-20 veta që po e kërkojnë këtë dhe jo 10-20 veta me lule”, tha Hasimja.

QSUT nëpërmjet një njoftimi zyrtar ka  përditësuar gjendjen shëndetësore të personave të lënduar gjatë protestës, ora 19:15.

Në deklaratë thuhet se në Spitalin Universitar të Traumës gjatë ditës së sotme janë trajtuar 26 të lënduar: efektivë policie, protestues e kalimtarë. Janë nën kujdesin mjekësor dy efektivë policie. Efektivi me inicialet D.K. është shtruar në shërbimin e Neurokirurgjisë për monitorim të mëtejshëm dhe paraqitet në gjendje të mirë shëndetësore.

Efektivi me inicialet F.R., i ardhur nga Shkodra,  i është nënshtruar ndërhyrjejes kirurgjikale për shkak të një dëmtimi në kokë, nga ku pritet reagimi.

Gjithashtu, 2 protestues janë nën kujdesin mjekësor dhe paraqiten në gjendje të mirë shëndetësore, dhe stabël për momentin.

Pak minuta më parë kanë mbërritur 3 kalimtarë, të cilët janë jashtë rrezikut për jetën.

Sipas njoftimit, në QSUT nuk ka asnjë të lënduar aktualisht.

Aktivistja Eva Pango, e cila po merr trajtim mjekësor, për momentin nuk paraqet indikacion për ndërhyrje kirurgjikale.

Sipas informacionit mjekësor, gjendja e saj do të ndiqet në dinamikë nga ekipi i neurokirurgëve, të cilët do të vendosin për një ndërhyrje të mundshme në varësi të ecurisë klinike.

Aktivistja u lëndua gjatë protestës nga bombula e gazit lotsjellës nga ku pësoi gjakderdhje dhe menjëherë u dërgua në spital.

Ndërkohë, nga ana tjetër operacioni i efektivit të Policisë në Shkodër ka përfunduar me sukses.

Ai u godit me gur në kokë nga protestuesit që ndodheshin përpara policisë vendore të Shkodrës.

Vijon të jetë e tensionuar protesta e nisur në kryeqytet mëngjesin e së enjtes. Protestuesit janë grumbulluar në orët e mbrëmjes përgjatë bulevardit dëshmorët e kombit aty ku i kanë vënë zjarrin disa kioskave në krah të bulevardit.

Policia ka krijuar një kordon para Kryeministrisë, ndërsa vazhdimisht drejt godinës qeveritare janë hedhur gurë dhe sende të tjera të forta nga ana e protestuesve.

Pasi policia i shpërndau me ujë dhe gaz lotsjellës, protestuesit janë rikthyer sërish në Bulevardin “Dëshmorët e Kombit”, ku kanë nisur të sulmojnë efektivët me gurë dhe sende të forta. Ndërkohë, efektivët e policisë kanë nisur të tërhiqen.

Organizata për Siguri dhe Bashkëpunim në Evropë ka reaguar lidhur me situatën e krijuar në Shqipëri pas protestave të ditëve të fundit, duke mbështetur thirrjen e Presidentit Bajram Begaj për qetësi dhe dialog gjithëpërfshirës.

Përmes një njoftimi zyrtar, Prezenca e OSBE-së në Shqipëri ka bërë të ditur se është e gatshme të ndihmojë në lehtësimin e dialogut mes palëve, nëse një gjë e tillë kërkohet.

Njoftimi i plotë:

Prezenca e OSBE-së në Shqipëri mirëpret mesazhin e sotëm të Presidentit Begaj.

Ne i bashkohemi thirrjes për qetësi dhe dialog gjithëpërfshirës dhe jemi të gatshëm të ndihmojmë në lehtësimin e një dialogu të tillë, nëse na kërkohet.

The OSCE Presence in Albania ëelcomes President Begaj’s message from today.

We share in the call for calmness and comprehensive dialogue and stand ready to assist in the facilitation of any such dialogue, if so requested

Eglent Bici sipërmarrës në pasuritë e paluajtshme ka reaguar përmes një statusi pas shkatërrimit masiv ndaj bizneseve në 3 ditë protesta në Tiranë.

Përmes një statusi në faqen e vet në Facebook sipërmarrësi shprehet se mbështet të drejtën e studentëve për të protestuar.

“Por asnjë kauzë nuk të jep të drejtën të hysh në pronën time, të shkatërrosh punën time dhe të rrezikosh njerëzit që mund të ndodhen brenda”, nënvijëzon Bici.

Statusi i plotë në Facebook

MË KENI HYRË NË BIZNES. MË KENI PREKUR SHTËPINË. MË KENI DHUNUAR!

Mbrëmë gjithë natën dhe sot mes dëmeve, thyerjes, shkatërrimit dhe vjedhjes në zyrën tonë më rri në mendje një pyetje:

Po sikur të kisha qenë brenda?

Po sikur në ato momente të kishte qenë aty një nga kolegët e mi? Po sikur të kishim qenë ende duke punuar, siç na ndodh shpesh deri vonë?

Çfarë do të kishte ndodhur? Çfarë do të më kishit bërë nëse do t’ju kisha dalë përpara dhe do t’ju kisha thënë: “Ndal! Kjo është prona ime. Kjo është puna ime. Nuk keni të drejtë ta prekni!”?

Nuk e di përgjigjen. Dhe pikërisht kjo më trondit më shumë se dëmet materiale.

Ju keni hyrë brenda, deri në katin e dytë. Keni dëmtuar kompjutera, keni shpërndarë dokumente, keni thyer dhe keni hedhur sende përtokë, keni marrë edhe vulën. Pse?

Çfarë ju kishte bërë ajo zyrë? Çfarë ju kishim bërë ne?!

Për mua, biznesi është shtëpi. Në disa kuptime, ta prekësh është edhe më rëndë: sepse nga puna aty mbahet shtëpia. Aty sigurojmë të ardhurat, mbajmë familjet, ndërtojmë të ardhmen e fëmijëve tanë.

Ne kalojmë aty më shumë se gjysmën e kohës sonë aktive. Aty kemi gëzimet, shqetësimet, lodhjen, shpresat. Aty ka ditë të bukura dhe net pa gjumë. Ka vite pune që nuk duken kur sheh vetëm një tavolinë, një kompjuter apo një tabelë me emrin MEI Realty.

Ju shihni sende për të thyer dhe shkatërruar; Unë shoh vite të tëra të jetës sime. Shoh mundin e kolegëve të mi. Shoh përgjegjësinë që kemi ndaj familjeve tona.

Për mua, kjo është e shenjtë.

Prandaj sot jam i zemëruar. Jam i lënduar. Ndjehem i vrarë në dinjitet. Dhe refuzoj ta kaloj këtë me një ngritje supesh: “Kështu ndodh në protesta.”

Jo! Nuk duhet të ndodhë. Dhe nuk duhet të mësohemi me të! Refuzoj ta pranoj.

Të protestosh është e drejtë dhe mbështes protestën dhe studentët. Por asnjë kauzë nuk të jep të drejtën të hysh në pronën time, të shkatërrosh punën time dhe të rrezikosh njerëzit që mund të ndodhen brenda.

Nuk i fus të gjithë protestuesit në një thes. Por ata që hynë dhe shkatërruan zyrën time u sollën si huliganë. Dhe emri i asnjë proteste nuk ua fshin përgjegjësinë.

Edhe kazanët, semaforët dhe rrugët janë të komunitetit tonë. I paguajmë ne. I përdorim ne. Shkatërrimi i tyre godet jetën tonë të përditshme.

Kërkoj që autorët të identifikohen dhe të mbajnë përgjegjësi. Nëse pas tyre ka njerëz që i kanë paguar, nxitur apo organizuar, të hetohen edhe ata. Deri në fund.

Por sot, mbi të gjitha, dua t’u flas si njeri atyre që e bënë këtë:

Si do të ndiheshit nëse dikush do t’ju hynte në shtëpi dhe do t’ju hidhte gjithçka përtokë? Nëse do të shkelte me këmbë punën e prindërve tuaj? Nëse brenda do të ishte njeriu juaj i dashur?

Kështu ndihem unë sot.

JU NUK MË PËRFAQËSONI. Dhuna juaj nuk ka mbështetjen time. Dhe heshtjen time nuk do ta keni edhe nëse vini përsëri dhe e shkatërroni zyrën fare.

Zyrën do ta rregullojmë. Do të ngrihemi nesër dhe do të punojmë përsëri. Por askush të mos e ngatërrojë forcën tonë për të vazhduar me pranimin e asaj që na bëtë.

PRONA IME, PUNA IME DHE SIGURIA E NJERËZVE TË MI NUK JANË SHESH PËR DHUNËN E ASKUJT.

Kryetari i Kuvendit, Niko Peleshi, ka njoftuar shtyrjen me një javë të seancës plenare, për shkak të situatës së tensionuar dhe akteve të dhunës gjatë protestave në vend.

Në reagimin e tij, Peleshi u ka bërë thirrje politikës dhe qytetarëve për përmbajtje, reflektim dhe dialog, duke theksuar rëndësinë e ruajtjes së rendit publik,

Ai ka shprehur gjithashtu shqetësimin për përfshirjen e të rinjve dhe të miturve në episode dhune, duke kërkuar që ata të mbrohen nga urrejtja dhe përplasjet.

Deklarata e plotë:

Çmoj si detyrim shtetëror dhe kombëtar të ndaj me opinionin publik një sqarim për ditën e sotme, ditë seance plenare për Kuvendin e Shqipërisë, si dhe një qëndrim për situatën që po kalon vendi.

Me përgjegjësinë për të garantuar një seancë të qetë, ku çdo deputet të ketë hapësirën kushtetuese dhe ligjore për të ushtruar detyrën e tij shtetërore, përballë një situate të paprecedentë dhune ndaj institucioneve të shtetit, pronës publike dhe pasurisë private të qytetarëve; në dritën e të dhënave shqetësuese nga institucionet ligjzbatuese për skenarë të rrezikshëm që po cenojnë rëndë rendin, sigurinë dhe qetësinë publike në vendin tonë dhe për të mos dhënë asnjë shkas për provokim, vendosa ta shtyj me një javë seancën plenare të planifikuar për sot.

Sot është dita kur çdo shtetar, çdo parti politike, çdo organizatë jofitimprurëse, përfaqësuesit e elitës akademike dhe të biznesit, dhe çdo qytetar i denjë i këtij vendi duhet t’i thërrasë arsyes dhe instinktit tonë kombëtar për paqe.

Jetojmë në demokraci. Kemi orientime politike të ndryshme. Kemi interesa të ndryshme. Grindemi, zemërohemi, protestojmë. Por mbi çdo ndryshim qëndron një interes i përbashkët kombëtar, një tokë e përbashkët: Shqipëria jonë.

Studentët, nxënësit dhe fëmijët tanë do ta trashëgojnë këtë vend, e bashkë me të edhe përgjegjësinë për ta bërë më të mirë.

Ata kanë të drejtë të kërkojnë prej nesh më shumë dhe më mirë.

Kanë të drejtë të dëgjohen më shumë.

Kanë të drejtë të ulen më shpesh në tryezat e përbashkëta që i fituan vetë duke ngritur zërin, si Tryeza e Paktit për Universitetin.

Studentët tanë do të jenë shqiptarët e parë që do të dalin në jetë si europianë, pjesë e familjes së madhe të Bashkimit Europian.

Prandaj ngjarjet e fundit të dhunës, djegieve dhe grabitjeve, që qëllimisht po u vishen atyre, janë një dëm i madh për të gjithë ne.

Shqipëria ka pritur shumë.

Shqipëria ka punuar shumë.

Shqipëria e meriton të hyjë në BE si e barabartë.

Asgjë nuk është e garantuar, sepse ky proces nuk është vetëm në duart tona dhe jo të gjithë janë miq e dashamirës. Kjo vlen aq më tepër në një kohë gjeopolitike plot tensione dhe lojëra influence, veçanërisht në rajonin tonë të trazuar të Ballkanit Perëndimor.

Ky proces mund të pengohet nga forca malinje, por kurrsesi nuk duhet të pengohet, as të prishet, nga vetë ne, shqiptarët modernë të shekullit XXI.

Ndaj, si Kryetar i Kuvendit të Shqipërisë, si qytetar dhe si student i Dhjetorit ‘90, bëj thirrje për përmbajtje dhe reflektim.

Shoqëria jonë duhet ta mbajë frymën dhe të reagojë njëzëri për t’i mbajtur larg dhunës të miturit dhe nxënësit e gjimnazeve.

Ata nuk duhet të ushqehen me urrejtje. Ata nuk duhet të formohen nga dhuna e rrugës. Ata nuk duhet të lihen në duart e forcave të errëta, me qëllime aspak shqiptare.

Këtu duhet të jemi të gjithë bashkë, pa dallime politike: demokratë, socialistë apo të paangazhuar. Fëmijët janë interesi më i lartë i një vendi. Ashtu siç edukohen sot, ashtu do të jetë Shqipëria nesër.

Edhe një herë, t’i thërrasim arsyes. Të tregojmë se fatin e vendit tonë e mbajmë në duart tona, përkrah aleatëve tanë strategjikë, me idealin e shqiptarizmës së Rilindasve në zemër.

Të ulemi. Të flasim. Të diskutojmë dhe të debatojmë për të ardhmen, pa harruar kurrë se, mbi të gjitha, jemi të gjithë shqiptarë.

Vijojnë tensionet në kryeqytet nga protesta. Disa prej pjesëmarrësve i kanë vënë flakën një kioske ambulante përballë Piramidës. Ndërkohë, ata po qëndrojnë në bulevard, pranë Piramidës, ndërsa policia ka krijuar një kordon para Kryeministrisë.

Ministri i Turizmit, Kulturës dhe Sportit, Blendi Gonxhja, u ka bërë thirrje prindërve që të flasin me fëmijët e tyre pas dëmtimeve të raportuara ndaj pasurive kulturore dhe historike gjatë protestave në Tiranë dhe Durrës.

Përmes një reagimi në rrjetet sociale, Gonxhja thekson se protesta nuk duhet të shndërrohet në vandalizëm, ndërsa nënvizon se mbrojtja e trashëgimisë kulturore është një përgjegjësi e përbashkët.

Ministri u bën thirrje prindërve të ndërgjegjësojnë fëmijët për rëndësinë e ruajtjes së pasurive publike, duke theksuar se asnjë pakënaqësi nuk justifikon shkatërrimin e objekteve që i përkasin të gjithë shoqërisë.

Postimi i plotë i ministrit Gonxhja

Të dashur prindër,

Pamjet që po shohim duan reagimin tuaj!

Mes turmës, të mitur e adoleshentë po dëmtojnë pasuri publike, institucione kulturore e trashëgimi historike, muze, teatro, biblioteka, objekte kulti

Si fëmijë, përgjegjësia fillon nga familja.

Flisni me ta. Për t’u kujtuar një kufi që nuk duhet kapërcyer:

Asnjë zemërim nuk justifikon shkatërrimin e asaj që u përket të gjithëve, sot e nesër!

Në Tiranë janë dëmtuar hapësirat e jashtme të Muzeut Kombëtar “Shtëpia me Gjethe”; hapësira të Teatrit të Kukullave; Muzeut Historik Kombëtar, Bibliotekës Kombëtare. Është sulmuar edhe hapësira e jashtme e Xhamisë së Et’hem Beut, monument unikal kulture i kategorisë 1! Në Durrës janë shkatërruar vepra e instalacione të Bienales së Artit!

Një muze nuk është i një qeverie.

Një teatër nuk është i një partie.

Një monument kulture nuk është kundërshtari  a shënjestra e askujt.

Këto janë pasuri publike kombëtare. Janë tempujt e artit, kulturës dhe kujtesës sonë kolektive. Janë vende ku shkohet për të mësuar historinë e festuar krijimtarinë.

Të dashur prindër, flisni me fëmijët tuaj!

Të protestosh nuk do të thotë të vandalizosh!

Qëndrimet politike mund të na ndajnë; përgjegjësia për ta mbrojtur historinë dhe kulturën duhet të na bashkojë!

Anarkia e kaosi duhet t’i japin vendin arsyes!

Policia ka boshatisur Bulevardin “Dëshmorët e Kombit” nga protestuesit, pasi ka ndërmarrë një inkursion ndaj tyre me makinën ujëhedhëse dhe gaz lotsjellës. Protestuesit janë shpërndarë përgjatë bregut të lumit Lana, pranë Tajvanit.

Bashkia e Shkodrës ka vesh me vetrata hekuri dritaret pasi u sulmua ditën e sotme me gur dhe sende te forta nga protestuesit.

Protesta e studentëve të enjten u shënua edhe në Shkodër, ku situata u tensionua me sulme ndaj godinës së Bashkisë dhe godinave të Partisë Socialiste dhe Partisë Demokratike.

Zhvillimi vjen në ditën e tretë të protestave të gjimnazistëve dhe studentëve, të cilat janë shtrirë edhe në qytete të tjera të vendit.

Ministria e Shëndetësisë ka bërë një përditësim mbi gjendjen shëndetësore të personave të lënduar gjatë protestës.

Në Spitalin Universitar të Traumës vijojnë të marrin kujdes mjekësor dy efektivë policie. Efektivi me inicialet D.K. është shtruar në shërbimin e Neurokirurgjisë për monitorim të mëtejshëm dhe paraqitet në gjendje të mirë shëndetësore, bën me dije MSH.

Ndërkohë, efektivi F.R., i ardhur nga Shkodra, po i nënshtrohet një ndërhyrjeje kirurgjikale për shkak të një dëmtimi në kokë.

Në të njëjtin spital po marrin trajtim mjekësor edhe katër protestues, të cilët paraqiten në gjendje të mirë shëndetësore.

Sipas të dhënave paraprake, protestuesja me inicialet E.P. ndodhet nën monitorim intensiv. Ajo është e vetëdijshme dhe paraqitet në gjendje të mirë shëndetësore.

Sa i përket Qendrës Spitalore Universitare “Nënë Tereza”, bëhet e ditur se aktualisht nuk ka persona të lënduar që po marrin trajtim mjekësor në këtë institucion.

Dhoma e Tregtisë dhe Industrisë Tiranë, në bashkëpunim me shoqatat e biznesit, ka reaguar përmes një deklarate ndaj akteve të dhunës dhe dëmtimit të pronës gjatë protestave në Tiranë, duke theksuar rëndësinë e respektimit të së drejtës për protestë paqësore, ruajtjes së rendit dhe garantimit të sigurisë së qytetarëve dhe bizneseve.

Në deklaratë shprehet shqetësimi për sulmet ndaj institucioneve publike, bankave, qendrave tregtare, ndërtesave dhe objekteve të përfaqësimit të biznesit. Gjithashtu, u bëhet thirrje institucioneve përgjegjëse për ruajtjen e rendit, ndërsa kërkohet që autorët e akteve të dhunës të mbajnë përgjegjësi individuale sipas ligjit.

Vijon situata e tensionuar në Tiranë, ndërsa ora shënon 17:30. Protestuesit janë mbledhur në grupe në Bulevardin “Dëshmorët e Kombit”, ku forcat e policisë kanë hedhur gaz lotsjellës. Ndërkohë, protestuesit po ua kthejnë mbrapsht dhe po qëllojnë me gurë në drejtim të policisë.

Zëvendëskryeministrja Albana Koçiu ka reaguar sërish për protestën që po zhvillohet prej tri ditësh në Tiranë, duke bërë thirrje që të rinjtë dhe të miturit të mos përfshihen në akte dhune dhe të mos përdoren për beteja politike.

Përmes një postimi në rrjetet sociale, Koçiu e ka cilësuar shqetësuese situatën e krijuar në rrugët e kryeqytetit, veçanërisht për shkak të pranisë së të rinjve dhe të miturve në skenat e dhunës.

Zëvendëskryeministrja thekson se asnjë përplasje politike nuk duhet të vihet mbi sigurinë e të miturve dhe se çdo prind dëshiron që fëmija i tij të kthehet shëndoshë e mirë në shtëpi.

“Pavarësisht bindjeve politike, të gjithë kemi të njëjtin shqetësim: sigurinë dhe të ardhmen e fëmijëve tanë.

Pamjet e dhunës në rrugët e Tiranës janë shqetësuese, sidomos kur mes tyre shohim të rinj dhe të mitur.

Të rinjtë kanë të drejtë të protestojnë, të shprehen dhe të kërkojnë një të ardhme më të mirë. Por askush nuk duhet t’i përfshijë në dhunë apo t’i përdorë për beteja politike.

Në fund të ditës, çdo prind dëshiron që fëmija i tij të kthehet shëndoshë e mirë në shtëpi.

Asnjë betejë politike nuk vlen më shumë se jeta, siguria dhe e ardhmja e fëmijëve tanë”, shkruan Koçiu në Facebook.

Policia ka ndërhyrë me gaz lotsjellës për të zmbrapsur një turmë të madhe protestuesish në Rrugën e Elbasanit

Protestuesit janë ndalur te një bankë e nivelit të dytë, përballë Ambasadës Amerikane, dhe e kanë shkatërruar atë.

Më tej ata kaluan ambasadën amerikanë duke vijuar marshimin në drejtim të qyteti studenti por janë kthyer mbrapsht pasi policia ka ndërhyrë duke hedhur një sasi të madhe gazi lotsjellës.

Protesta vijon në Tiranë, ndërsa një grup protestuesish janë pozicionuar në rrugën e Elbasanit. Gjatë marshimit në këtë rrugë, disa prej tyre kanë thyer dyert dhe xhamat e një banke private dhe janë futur brenda saj, duke nxjerrë jashtë shkresa dhe dokumente.

Ambasada amerikanë në Tiranë ka reagoi sërish pas përplasjeve të shënuara pasditen e së enjtes gjatë protestës së nisur në Rrugën e Durrësit dhe të zhvendosur në disa zona të Tiranës.

Përmes një mesazhi drejtuar shtetasve amerikanë në Tiranë ambasada thekson se protesta është shndërruar në akte të dhunshme dhe rrezikon të përhapet.

Ambasada u bën thirrje qytetarëve të jenë vigjilentë dhe jepini përparësi sigurisë suaj personale

Njoftimi i plotë:

Demonstratat në Tiranë, të nisura në Rrugën e Durrësit, pranë Sheshit Skënderbej, si dhe në zonën përreth ndërtesave qeveritare, janë përshkallëzuar në dhunë, duke përfshirë përdorimin e mjeteve ndezëse, hedhjen e gurëve dhe dëmtimin e pronës publike dhe private.
Demonstrata të tjera mund të zhvillohen gjatë ditëve në vijim.
Protestat mund të shtrihen edhe në rrugët përreth, duke sjellë prani të shtuar të forcave të policisë, probleme me qarkullimin, devijime të trafikut dhe bllokime rrugësh.
Personeli i Ambasadës Amerikane në Tiranë është këshilluar të shmangë të gjitha zonat ku zhvillohen demonstrata.
Ju lutemi të qëndroni vigjilentë dhe t’i jepni përparësi sigurisë suaj personale. Ndiqni mediat lokale dhe zbatoni udhëzimet e autoriteteve vendore të zbatimit të ligjit për informacionet më të fundit.
Masat që duhen marrë:
Rrisni masat e sigurisë personale duke ndjekur këto këshilla:
Shmangni demonstratat.
Jini të vëmendshëm ndaj mjedisit përreth. Kufizoni shpërqendrimet, si përdorimi i telefonit apo kufjeve në ambiente publike.
Ndiqni mediat lokale.
Mbani gjithmonë një plan emergjence ose një strategji për t’u larguar nga zona në rast rreziku.
Shmangni tërheqjen e vëmendjes dhe mbani një profil të ulët

Përplasje të ashpra janë shënuar pasditen e së enjtes mes policisë dhe protestuesve që janë zhvendosur në rrugën e Elbasanit.

Gazetarët e Euronews Albania raportuan se një vajzë ka mbetur e plagosur në kokë nga një bombol gazi të hedhur nga policia për gazin lotsjellës.

Për shkak të gjakderdhjes së madhe, ajo u transportua me urgjencë në spital për marrjen e ndihmës mjekësore.

Dita e tretë e protestës është shënuar sërish me tensione të larta teksa protestuesit të maskuar po shkatërrojnë gjithçka që u del para.

Të shpërndarë në grupe, që prej orës 09:00 të mëngjesit, protestuesit po lëvizin nëpër Tiranë duke sulmuar disa prej institucioneve dhe policëve, me gurë e sende të forta.

Aktualisht ata po qëllojnë ende drejt efektivëve me molotovë dhe fishekzjarrë.

Ministria e Shëndetësisë dhe Mirëqenies Sociale ka dhënë informacionin më të fundit mbi gjendjen shëndetësore të personave të lënduar gjatë protestës.

Sipas njoftimit zyrtar, në Spitalin Universitar të Traumës janë paraqitur gjithsej 14 persona të lënduar, mes tyre 8 efektivë policie, 4 protestues dhe 2 të mitur.

Aktualisht, në këtë spital vijojnë të marrin kujdes mjekësor 4 efektivë policie. Dy prej tyre janë në gjendje të mirë shëndetësore, ndërsa një efektiv nga Shkodra ndodhet nën monitorim intensiv.

Gjithashtu, në spital po marrin trajtim mjekësor edhe 4 protestues, të cilët, sipas ministrisë, janë në gjendje të mirë shëndetësore.

Sa u përket të miturve, njëri prej tyre është larguar nga spitali në gjendje të mirë shëndetësore dhe jashtë rrezikut për jetën, pasi ka marrë trajtimin e nevojshëm. Largimi është bërë i shoqëruar nga prindi dhe nën kujdesin e ekipit mjekësor, me praninë e një psikologu.

Ndërkohë, në Qendrën Spitalore Universitare “Nënë Tereza” është paraqitur vetëm një efektiv policie, i cili, pasi ka marrë trajtimin mjekësor, është larguar sipas rekomandimit të mjekëve.

Informacioni i Ministrisë së Shëndetësisë i referohet situatës deri në orën 16:15.

Kreu i Partisë Demokratike, Sali Berisha, ka reaguar nga selia blu lidhur me sulmin e protestuesve ndaj selisë së PD-së në Shkodër. Berisha e cilësoi ngjarjen si një provokacion nga kryeministri Edi Rama, ndërsa theksoi se Partia Demokratike do të vijojë të mbështesë protestën e të rinjve deri në fitore dhe largimin e kryeministrit.

“Jam këtu për të paralajmëruar Edi Ramën se asnjë lloj provokacioni i ulët, i llojit që organizoi në Shkodër ndaj selisë së PD-së, nuk do të lëkundë kurrë, deri në fitore, mbështetjen totale të PD-së për revoltën studentore”, tha Berisha.

Kryeministri Edi Rama ka postuar në faqen e vet një Facebook një video që tregon një polic të Shqiponjave teksa takohet me familjarët e vet.

Respekt, shkruan Rama krahas videos të publikuar në rrjetin e vet social.

Ndërkohë që nga mëngjesi i së enjtes nëpër rrugët e Tiranës zotëron kaosi për shkak të protestës që është përhapur në disa zona teksa studentëve u janë bashkuar edhe shumë gjimnazistë që kanë bojkotuar mësimin.

Partia Socialiste e Shqipërisë ka reaguar përmes një postimi në rrjetet sociale lidhur me situatën e përshkallëzuar nga protestat në Tiranë.

Në reagimin e saj, PS-ja thekson se shqiptarët nuk do të jenë pengje të së shkuarës ndërsa postimi shoqërohet me një video të përplasjeve mes protestuesve dhe policisë.

Reagimi i plotë

“Përgjegjësia para ligjit është e gjithsecilit dhe gjithkush që ka dorë në këtë katrahurë sigurisht që do paguajë. Shqipëria nuk do të kthehet më kurrë pas. Shqiptarët kurrë më nuk do të jenë pengje të së shkuarës. E ardhmja është e Shqipërisë dhe shqiptarëve”, thuhet në reagimin e Partisë Socialiste.

Në formë simbolike për të qenë në vijën e parë të policisë ka qëndruar një i ri, i cili sipas raportimeve qëndron i pashqetësuar pavarësisht presionit të ujit nga ana e policisë.

I pyetur nga gazetari Ardit Hoxha se çfarë domethënie ka qëndrimi me karrige përpara efektivëve, i riu thotë se kjo është një mënyrë për ti treguar që nuk i trembet as dhunës, as policisë dhe këtë metodë ka zgjedhur pas disa ditëve protestë paqësisht.

“Nuk i kemi frikë, jemi këtu për Shqipërinë jo për Edi Ramën. Rama të tërhiqet sa më shpejt për të mirën e kombit, sepse është duke e shkatërruar vetë. Është e keqe që na e ka bërë për 35 vite. Jam nga Lapraka, kam 135 ditë që protestoj paqësisht dhe këto tre ditë në këtë formë. Unë kam mënyrën time tu dal përpara, nëse më arrestojnë, le të më arrestojnë. Nuk e kam frikë dhunën e atyre”, tha ai.

Drejtori i Përgjithshëm i Policisë së Shtetit, Skënder Hita tha në një konferencë për shtyp nga ambientet e Drejtorisë së Përgjithshme të Policisë së Shtetit se 71 efektivë police kanë mbetur të dëmtuar në aktet e dhunës në 3 ditët e protestës në Tiranë.

Hita i bëri thirrje prindërve dhe pedagogëve të mos lejojnë që fëmijët dhe nxënësit të përdoren si mburojë për aktet e dhunës ndaj institucioneve dhe pronës private.

“Prej gati 72 orësh, kryeqyteti po përballet me valë dhune, zjarrvënieje dhe shkatërrimi, duke vënë në rrezik jetën dhe sigurinë e qytetarëve. Në këto ngjarje janë plagosur 71 efektivë, disa prej tyre me dëmtime të rënda. Policia garanton të drejtën kushtetuese të çdo qytetari, studenti apo force politike për të protestuar paqësisht, por protesta nuk mund të jetë mburojë për dhunën dhe shkatërrimin e pronës.

Çdo sulm ndaj uniformës së Policisë është sulm ndaj shtetit ligjor dhe shtetit. Kush ka ushtruar dhunë ndaj Policisë, ka dëmtuar institucionet, pronën publike dhe private, do të identifikohet dhe do të përballet me ligjin. Ju kërkoj që të tregoni profesionalizëm, vetëpërmbajtje dhe të mos provokoheni, por mos u tërhiqni.

Pjesëmarrësve u bëj thirrje të distancohen nga personat e maskuar dhe të dhunshëm. Përgjegjësia është individuale. Do të përballeni me ligjin. Ndaloni dhunën ndaj Policisë! Çdo akt dhune rrezikon jetën dhe shëndetin e qytetarëve. Mesazhi është i qartë dhe i prerë: Mos e ngatërroni vetëpërmbajtjen me dobësinë. Policia nuk tërhiqet përballë dhunës. Institucionet dhe qytetarët do të mbrohen”, thotë Hita.

Komandanti i forcave të rendit në policinë e Shkodrës, Fasli Rama është në gjendje të rëndë shëndetësore.

Efektivi i policisë është dërguar me urgjencë drejt Tiranës për shkak se rrezikon jetën duke qenë se ka një plagë të rëndë në kokë.

Komandanti u godit me gur në kokë nga protestuesit që ndodheshin përpara policisë vendore të Shkodrës.

Gjatë një përleshje me efektivët, punonjësi i policisë Fasli Rama mori goditje të fortë në kokë duke qenë në gjendje të rëndë për jetën.

Vijojnë shoqërimet masive të të rinjve gjatë protestës studentore në Korçë.

Sipas pamjeve, ka përplasje mes policisë dhe protestuesve, të cilët kundërshtojnë shoqërimin e tyre.

Mes thirrjeve për lirimin e shokëve të shoqëruar, disa studentë po kundërshtojnë me forcë ndërhyrjen e policisë dhe shoqërimin e tyre.

Situata është tensionuar nga protesta në Shkodër, ku studentët po hedhin gurë në drejtim të Bashkisë.

Sipas pamjeve, studentët e revoltuar kanë shkruar me bojë në muret e Bashkisë, ndërsa po thyejnë xhamat dhe po hedhin kapsolla drejt godinës.

Deri më tani, policia nuk ka ndërhyrë, ndërsa situata po monitorohet me dronë. Nga kjo situatë raportohet se një vajzë është plagosur nga gurët.

Kryeministri i Shqipërisë Edi Rama i tha Reuters të enjten se nuk do të jepte dorëheqjen për shkak të protestave të dhunshme të udhëhequra nga studentët që hynë në ditën e tretë radhazi.

Policia përdori topa uji për të shpërndarë protestuesit që thyen dritare dhe dëmtuan pronat në kryeqytet, duke bërë që parlamenti të anulonte seancën e tij.

Studentët që protestojnë kundër rritjes së kostove të arsimit dhe korrupsionit kanë kërkuar dorëheqjen e Ramës.

“Sa i përket thirrjeve për dorëheqjen time, qeveritë ndryshohen përmes zgjedhjeve demokratike. Ne patëm zgjedhje vitin e kaluar, jo një revolucion”, tha Rama në përgjigjet me shkrim për Reuters.

“Përgjegjësia ime është të dëgjoj, të adresoj shqetësimet legjitime dhe ta ndihmoj Shqipërinë të ecë përpara. Alternativa do të ishte tradhtia ndaj shqiptarëve që më dhanë një mandat të fortë për të përfunduar negociatat për anëtarësim në Bashkimin Evropian.”

Rama tha se do të ishte gati të diskutonte koston në rritje të arsimit, por shtoi: “Sulmi ndaj institucioneve, shkatërrimi i pronës publike dhe kërcënimi i sigurisë publike nuk kanë të bëjnë fare me kërkesat legjitime të studentëve.”

Protestat shënojnë sfidën më të madhe deri më tani për Ramën, i cili fitoi një mandat të katërt vitin e kaluar.

Trazirat vijnë pas muajsh demonstratash kryesisht paqësore të nxitura nga planet për të ndërtuar një vendpushim luksoz në bregdetin jugor të Shqipërisë të mbështetur nga dhëndri i Presidentit të SHBA-së Donald Trump, Jared Kushner, një projekt që është përballur me sfida ligjore.

Policia e Shtetit u ka bërë thirrje nxënësve dhe prindërve të ruajnë qetësinë dhe të shmangin përfshirjen në akte dhune, në një kohë kur protestat e të rinjve vijojnë të shoqërohen me tensione.

Përmes një mesazhi publik, policia u kërkon nxënësve të mos përfshihen në veprime që mund të rrezikojnë jetën, shëndetin dhe të ardhmen e tyre, si dhe të largohen menjëherë nga vendet ku ushtrohet dhunë.

Një apel i veçantë u drejtohet edhe prindërve, të cilëve u kërkohet të kujdesen për fëmijët dhe t’i këshillojnë ata të qëndrojnë larg situatave të rrezikshme.

Policia thekson se efektivët janë në terren për të garantuar rendin, qetësinë dhe sigurinë publike, si dhe për të mbrojtur jetën dhe shëndetin e qytetarëve.

“Siguria e tyre është përgjegjësi e përbashkët”, thuhet në apelin drejtuar prindërve, ndërsa Policia e Shtetit u kërkon qytetarëve bashkëpunim për të shmangur përshkallëzimin e situatës.

Studentët sapo kanë mbërritur sërish para Parlamentit. Tensionet kanë nisur menjëherë pasi protestuesit kanë hedhur gurë në drejtim të policisë. Ata gjithashtu kanë djegur koshat e mbeturinave dhe kanë shkulur sinjalistikat rrugore.

Policia mësohet se është kundërpërgjigjur me gaz lotsjellës. Ende nuk dihet nëse protesta do të vijojë para Parlamentit apo do të zhvendoset sërish para Ministrisë së Arsimit.

Për rreth dy orë studente dhe gjimnaziste nga qyteti i Korçës janë duke protestuar në rrugë dhe institucionet.

Të rinjtë kanë thyer dhe shkatërruar hollin e gjimnazit “Raqi Qirixhi”, xhamat e drejtorisë arsimore dhe gjithë sinjalistiken e qytetit. Ata gjithashtu kanë djegur koshat e mbeturinave.

Te rinjtë kanë bllokuar rrugët kryesore teksa marshojnë ndërsa aktualisht kanë bllokuar rrugën e teatrit.

Janë shoqëruar dy persona deri më tani, ndërsa njëri prej të rinjve ka sulmuar edhe drejtorin e policisë së Korçës, Vilson Bala.

Studentët kanë vendosur të largohen nga Ministria e Arsimit për të vijuar protestën e tyre drejt Parlamentit. Ende nuk dihet nëse ata do ta vijojnë protestën para Kuvendit ose vetëm do të kryejnë një marshim.

Policia prej disa minutash tentoi të shpërndajë protestuesit para ministrisë së Arsimit teksa të rinjtë rezistuan edhe ndaj ujit dhe gazit lotsjellës. Ata pasi spostoheshin pak metra, riktheheshin duke hedhur sërish gurë ndaj policisë si dhe duke shkulur kangjellat në trotuare.

Një grup të rinjsh i janë bashkuar protestës para Ministrisë së Arsimit. Mësohet se gjimnazistët kanë ardhur nga rrethrrotullimi i Zogut të Zi teksa menjëherë kanë nisur hedhjen e gurëve ndaj policisë.

Policia prej disa minutash po tenton të shpërndajë protestuesit teksa të rinjtë po rezistojnë edhe ndaj ujit dhe gazit lotsjellës. Ata pasi spostohen pak metra, rikthehen duke hedhur sërish gurë si dhe duke shkulur kangjellat në trotuare.

Policia ka arrestuar 55 persona, mes tyre edhe dy të mitur, pas akteve të dhunës gjatë protestës së 14 tetorit para Ministrisë së Arsimit dhe në disa zona të kryeqytetit. 98 shtetas të tjerë janë proceduar penalisht, ndërsa 51 punonjës policie kanë mbetur të dëmtuar.

Protesta e 14 tetorit në Tiranë është shoqëruar me përplasje të forta mes protestuesve dhe Policisë, dëmtime të institucioneve shtetërore dhe bizneseve private, si dhe shkatërrimin e disa pajisjeve dhe automjeteve.

Në njoftimin zyrtar, Policia bën me dije se ka arrestuar në flagrancë 55 shtetas dhe ka proceduar penalisht 98 të tjerë, pas veprimeve hetimore të kryera nën drejtimin e Prokurorisë së Tiranës.

Sipas Policisë, gjatë tubimit para Ministrisë së Arsimit, në rrugën e Durrësit dhe më pas në akse të tjera të kryeqytetit, grupe protestuesish të maskuar kanë hedhur gurë, pllaka guri, sende metalike, kapsolla dhe kokteje molotovi në drejtim të efektivëve, institucioneve dhe subjekteve private.

Si pasojë e përplasjeve, janë dëmtuar kangjellat, muret dhe dritaret e godinës së Ministrisë së Arsimit, si dhe fasada xhami, bankomate, kamera, semaforë, tabela reklamash dhe sinjalistika rrugore. Dëmtime janë raportuar edhe në banka, institucione financiare dhe biznese të ndryshme.

Situata është përshkallëzuar edhe në zona të tjera të Tiranës, përfshirë bulevardet “Dëshmorët e Kombit” dhe “Gjergj Fishta”, rrugën “Muhamet Gjollesha” dhe rrugën e Durrësit.

Sipas Policisë, disa protestues kanë hyrë në rrethimin e Komisariatit të Policisë Nr. 2, ku kanë goditur godinën me sende të forta dhe lëndë piroteknike, duke dëmtuar xhamat dhe portën hyrëse. Gjithashtu, një automjet policie është djegur me lëndë djegëse, ndërsa tre automjete të parkuara janë dëmtuar.

Nga përplasjet janë dëmtuar 51 punonjës policie.

Në kuadër të hetimeve, Policia ka arrestuar 55 persona, mes tyre dy të mitur, përkatësisht 15 dhe 17 vjeç. Ndërkohë, 98 shtetas të tjerë janë proceduar penalisht.

Grupi hetimor, në bashkëpunim me Prokurorinë, vijon punën për identifikimin e personave të tjerë të dyshuar për përfshirje në akte dhune dhe për dokumentimin e plotë të ngjarjeve të regjistruara gjatë protestës.

Materialet procedurale i janë referuar Prokurorisë së Tiranës për veprime të mëtejshme.

Vijojnë tensionet para Ministrisë së Arsimit. Protestuesit po tentojnë herë pas here që të grumbullohen para Ministrisë së Arsimit teksa policia menjëherë ndërhyn për shpërndarjen e tyre.

Sapo protestuesit rigrumbullohen dhe hedhin sende të forta e gurë ndaj tyre dhe ndërtesës së ministrisë, policia kundërpërgigjet me ujë. Gjithashtu ka patur përplasje ç’ka ka sjellë disa shoqërime të të rinjve, mes tyre edhe gjimnazistë.

Edhe në Vlorë ka nisur reagimi i studentëve në shenjë solidarizimi me studentët e Tiranës. Një grup studentësh kanë dalë nga Fakulteti i Shkencave Humane dhe po marshojnë përgjatë bulevardit të Vlorës.

Ata po protestojnë përgjatë gjithë rrugës, duke bërë thirrje të ndryshme, si “Bashkohuni me ne”, në përpjekje për t’u bashkuar edhe studentët e tjerë të qytetit.

Marshimi deri më tani është paqësor, ndërsa studentët pritet të vijojnë drejt Rektoratit Qendror të Universitetit të Vlorës.

Pak metra pa u afruar protestuesit para Ministrisë së Arsimit, ka ndërhyrë policia. Forca të shumta të policisë kanë reaguar për të shpërndarë të rinjtë që po shkonin në drejtim të Ministrisë.

Protestuesit nisën duke hedhur gurë në drejtim të objektit të ministrisë teksa policia menjëherë reagoi me gazlotsjellës për shpërndarjen e tyre.

Gjithashtu gazetarët e Euronews Albania bëjnë me dije se ndryshe nga dy ditët e tjera të protestës, është krijuar një “kordon” ku lejohen gazetarët që të qëndrojnë dhe për të mos u bashkuar me turmën.