Mijëra e mijëra gjimnazistë e studentë vërshuan në rrugët e Tiranës ditën e sotme (15 tetor) kundër qeverisë Rama. Pakënaqësia ndaj qeverisë është tejet e madhe saqë sot, në ditën e tretë të protestës studentore, pothuajse të gjithë studentët dhe gjimnazistët nga e gjithë Shqipëria janë në bojkot.
Protestuesit i kanë lënë afat kryeministrit Edi Rama deri sot, në orën 13:00, për të dhënë dorëheqjen. Ndërsa paralajmërojnë kryeministrin Rama se, nëse nuk jep dorëheqjen deri në orën 13:00, ata do t’i drejtohen Presidencës, ku do të kërkojnë shpërndarjen e Parlamentit.
Në Tiranë mijëra protestues kanë bllokuar rrugët duke u kthyer në “zotër” të tyre. Gjimnaze të shumta dhe Universitetet janë në bojkot dhe po shprehin revoltën e tyre.
Protestuesit janë ndalur te Ministria e Infrastrukturës dhe Energjisë, duke thyer xhamat e godinës, ndërsa situata në kryeqytet vijon të jetë e tensionuar.
Mijëra gjimnazistë nga Kamza janë nisur në drejtim të kryeqytetit me brohoritje kundër qeverisë Rama që e ka zhytyr vendin në varfëri dhe ka lënë shëndetësinë e arsimin në mëshirë të fatit.
Në Universitetin “Aleksandër Moisiu” në Durrës mësimi është bojkotuar dhe po protestohet kundër një qeverie të korruptuar.
Qindra gjimnazistë dhe studentë kanë dalë në protestë këtë të enjte edhe në qytetin e Korçës. Të rinjtë janë solidarizuar me protestat e studentëve në kryeqytet që po protestojnë këtë të enjte në ditën e tretë.
Gjatë marshimit të tyre, protestuesit kanë bllokuar bulevardin kryesor të qytetit teksa po shkojnë drejt Bashkisë. Gjatë marshimit janë hedhur kapsolla dhe lëndë piroteknike në rrugë.
Frika nga protesta e studentëve, qeveria Rama anulon seancën në Kuvend
Kuvendi i Shqipërisë parashikonte të mblidhej sot, më 15 tetor, në seancë plenare, në orën 10:00, por burime për Boldnews.al bëjnë me dije se seanca u anulua. Si duket, frika nga protesta e studentëve ka kapluar qeverinë e Ramës.
Në rendin e ditës ishin parashikuar katër interpelanca me ministra, shqyrtimi i disa projektligjeve, si dhe votimi i projektvendimit për ngritjen e Komisionit të Posaçëm Parlamentar për fazën e dytë të Reformës Administrativo-Territoriale.
Rama nis me kërcënimet
Edi Rama ka reaguar për protestat dhe incidentet e regjistruara në Tiranë duke deklaruar se dhuna nuk përfaqëson studentët dhe duke akuzuar opozitën për nxitjen e akteve të dhunshme.
Nga godina e Kolegjit të Evropës, e cila një ditë më parë u dogj nga të rinjtë, kreu i qeverisë kërcënoi protestuesit, duke thënë se përgjegjësit do të dalin para ligjit dhe kushdo që ka dorë në këtë katrahurë do të paguaj.
Pasi mohoi që protestuesit të jenë studentë, Rama harron dhe deklaron se gjithsesi qeveria është e gatshme të dialogojë me ta dhe të diskutojë për gjetjen e zgjidhjeve për kërkesat e tyre.
“Kjo nuk është dora e studenteve. Studentët janë të mirëpritur dhe për ta ne jemi gati të ulemi, të flasim dhe të diskutojmë për gjerat që kërkojnë zgjidhje., këto janë të tjera duar, duar që përpiqen ta ulin poshtë Shqipërinë. Janë duart e një opozite, e cila me maska të verbërish përpara, me zjarr dhe hekur kërkon ta rikthejë Shqipërinë, aty ku Shqipëria nuk do të rikthehet kurrë, në humnerën nga ne të gjitha bashkë e nxorëm dhe ku po e ngjisim në majën historike, në BE.
Qëlloi që kjo zyrë e Kolegjit të Evropës të jetë sot simbol i gjithckaje që Tirana dhe Shqipëria panë po shohin në këto orë të vështira, por janë orë që do ti kalojmë.
Shqipëria do të vazhdojë në rrugën e saj për Evropën e të gjithë vajzave dhe djemeve të saj. Kurrë më nuk do të bjërë në ato duar që e kanë kapur opozitën shqiptare, dhe nuk do të thotë se do ta kapin për fyti Shqipërinë. Kushdo që mendon se ligji është larg, gabon. Përgjegjësia para ligjit është e gjithësecilit dhe kushdo që ka dorë në këtë katrahurë, do të paguajë.
Shqipëria nuk do të kthehet më pas, shqiptarët nuk do jenë kurrë pengje të së shkuarës dhe e kaluara që u rikthye me verbërinë e saj në këto orë në qendër të Tiranës, si një fantazmë që përpiqet të bëjë atë sa herë shqiptarët kanë dashur të ngrene kokën do të mbetet e kaluar. E ardhmja është e studenteve, e ardhmja është e Shqipërisë dhe e shqiptarëve”– tha Rama.
