Protesta e studentëve, që u përshkallëzua të martën dhe të mërkurën, është përhapur të enjten në disa prej qyteteve kryesore të vendit, ku studentë e të rinj kanë marshuar, kanë bllokuar rrugët, kanë goditur me vezë e gurë institucionet publike dhe kanë tentuar të krijojnë mosbindje civile.
Protestat filluan mëngjesin e së enjtes në Durrës, Shkodër, Korçë, Elbasan, Vlorë, Lushnjë e në qytete të tjera, ku studentë dhe gjimnazistë bojkotuan mësimin, dolën në rrugë, bllokuan segmente të tyre me kosha mbeturinash, dëmtuan sinjalistikën rrugore dhe sulmuan me gurë e vezë institucionet publike.
Raportimet e medias nga këto qytete tregojnë se protestuesit sulmuan me sende të forta Bashkinë e Shkodrës, duke thyer xhamat e kateve të para. Në Durrës, protestuesit dëmtuan sinjalistikën rrugore dhe bllokuan disa rrugë. Pamje të ngjashme u regjistruan në Korçë, ku u thyen xhamat e një prej gjimnazeve të qytetit dhe protestuesit, kryesisht gjimnazistë, dëmtuan sinjalistikën rrugore.
Në të gjitha qytetet janë raportuar po ashtu edhe përplasje me policinë, e cila ka ndaluar dhe shoqëruar të rinj pas sulmeve ndaj institucioneve. Ndërkohë, nxënës dhe studentë nga Kamza marshuan drejt kryeqytetit të enjten për t’iu bashkuar protestuesve këtu.
Përhapja e protestave në rrethe vjen pas dy ditësh përplasjesh në kryeqytet — një përshkallëzim i protestave disamujore paqësore që ka sjellë lëndimin e dhjetëra protestuesve dhe punonjësve të policisë, si dhe dëmtim të sinjalistikës rrugore, të dyerve e xhamave të institucioneve dhe të bizneseve private.
Gjatë tubimeve, protestuesit hodhën koktej molotovi dhe sende të forta kundër policisë, ndërsa kjo e fundit përdori gaz lotsjellës, autobotë me ujë dhe shkopinj gome për shpërndarjen e turmave.
