Kryeministri shqiptar Edi Rama hodhi poshtë të enjten thirrjet për dorëheqje, ndërsa mijëra protestues, të udhëhequr nga studentët, thyen xhama dhe u përleshën në mënyrë të vazhdueshme me forcat e policisë, të cilat përdorën topa uji dhe gaz lotsjellës në kryeqytet.
Protestuesit shprehën zemërimin e tyre për korrupsionin e perceptuar, koston dhe cilësinë e arsimit, si dhe për një marrëveshje që parashikon shitjen e pjesëve të bregdetit të paprekur jugor të Shqipërisë për zhvillimin e një resorti luksoz, të mbështetur nga dhëndri i Presidentit amerikan Donald Trump, Jared Kushner.
Ata kërkuan dorëheqjen e Ramës, duke deklaruar se askush nuk i kishte dëgjuar shqetësimet e tyre gjatë një vere protestash kryesisht paqësore kundër projektit të zhvillimit.
Në një deklaratë me shkrim për Reuters, Rama hodhi poshtë thirrjet për largimin e tij.
“Përgjegjësia ime është të dëgjoj, të trajtoj shqetësimet legjitime dhe ta çoj Shqipërinë përpara. Alternativa do të ishte një tradhti ndaj shqiptarëve që më dhanë një mandat të fortë për të përfunduar negociatat e anëtarësimit në Bashkimin Europian”, deklaroi ai.
Rama dënon sulmet ndaj pronës publike
Një studente, e cila u prezantua me emrin Kiara, tha se kostoja e jetesës, perspektiva e dobët për punësim dhe korrupsioni i pretenduar ishin problemet kryesore.
“Kryeministri ynë është vetë kuptimi i fjalës korrupsion. Mund të gjesh punë në profesionin tënd vetëm nëse njeh dikë që njeh dikë tjetër”, tha ajo, me fytyrën e mbuluar me maskë, ashtu si shumë prej protestuesve në rrugët e Tiranës të enjten.
Protestat, që kanë hyrë tashmë në ditën e tretë, përbëjnë sfidën më të madhe deri më tani për Ramën, i cili fitoi mandatin e katërt vitin e kaluar, duke vendosur anëtarësimin në BE në qendër të fushatës së tij. Parlamenti anuloi seancën e planifikuar, ndërsa dhuna shpërtheu sërish në afërsi të tij.
Rama, qeveria e të cilit mohon akuzat për korrupsion, tha se ishte i gatshëm të diskutonte për rritjen e kostos së arsimit, por shtoi:
“Sulmet ndaj institucioneve, shkatërrimi i pronës publike dhe kërcënimi i sigurisë publike nuk kanë asnjë lidhje me kërkesat legjitime të studentëve”.
Rrugët e Tiranës ishin të mbushura me kosha mbeturinash të djegur, stacione autobusësh të shkatërruara dhe semaforë të dëmtuar.
Retë e gazit lotsjellës u përhapën në qendër të qytetit. Protestuesit hodhën gurë ndaj policisë, ndërsa forcat e rendit përdorën topa uji për t’i zmbrapsur. Në sheshin qendror Skënderbej, policia goditi me shkopinj protestues që po largoheshin me vrap, ndërsa turistët ndiqnin skenat.
Protestuesit thonë se zëri i tyre nuk po dëgjohet
“Kjo qeveri është e korruptuar, e drejtuar dhe e udhëhequr nga një kryeministër i korruptuar”, tha protestuesi Lulzim Tanushi, me profesion avokat.
“Që kur Rama erdhi në pushtet, ai ka abuzuar dhe ka shkatërruar jetët e njerëzve. Kjo është arsyeja pse njerëzit po shprehin zemërimin e tyre, sepse më parë nuk u dëgjuan”, shtoi ai.
Protestat pasojnë disa muaj demonstratash kryesisht paqësore, të nxitura nga planet për ndërtimin e resortit, projekt që është përballur edhe me sfida ligjore.
Banorë të fshatrave të zonës i thanë Reuters në korrik se tokat e tyre ishin shitur në mënyrë të padrejtë për zhvillimin e projektit. Reuters raportoi më vonë se personi që kishte shitur tokën ishte në kërkim nga prokuroria për trafik droge, akuza që avokati i tij i mohoi.
Reuters nuk gjeti prova për shkelje nga Kushner, i cili nuk është i përfshirë drejtpërdrejt në mosmarrëveshjen me banorët.
Shqipëria synon anëtarësimin në BE që në vitin 2028
Imazhi i Shqipërisë është dëmtuar ndër vite nga skandalet e korrupsionit dhe analistët politikë thonë se vendi është një qendër për grupet kriminale që kërkojnë të pastrojnë para të përfituara nga trafiku i drogës dhe armëve, duke ndërlikuar përpjekjet e vendit për t’u anëtarësuar në Bashkimin Europian.
Së bashku me Malin e Zi, Shqipëria aktualisht kryeson procesin e anëtarësimit mes vendeve të Ballkanit dhe synon hyrjen në BE që në vitin 2028.
“Korrupsioni duhet të luftohet dhe, siç e ka rikonfirmuar së fundmi vetë BE-ja, Shqipëria po e lufton atë si kurrë më parë”, deklaroi Rama për Reuters.
“Ndoshta disa forca, brenda dhe jashtë vendit, nuk duan që Shqipëria të ketë sukses si vend pararojë në anëtarësimin në BE. Por unë nuk do të lejoj që dhuna të nxjerrë nga binarët të ardhmen europiane të Shqipërisë”, shtoi ai.
Delegacioni i Bashkimit Europian në Shqipëri, në një deklaratë në platformën X, tha: “Dialogu konstruktiv është e vetmja rrugë përpara”.
Trazirat janë pjesë e një vale aktivizmi studentor në Europë. Në Francë, nxënësit e shkollave të mesme kanë organizuar protesta dhe bllokime të shkollave për disa javë, duke kërkuar më shumë mësues dhe kushte më të mira, me argumentin se përkeqësimi i ndërtesave shkollore dhe mbipopullimi i klasave po dëmtojnë arsimin. /REUTERS
