Drejtori i Policisë së Shtetit, Skënder Hita, ka reaguar lidhur me përplasjet e dhunshme gjatë protestës, duke u bërë thirrje efektivëve të veprojnë me përmbajtje dhe vendosmëri, ndërsa theksoi se çdo akt dhune do të trajtohet në përputhje me ligjin.

Hita deklaroi se punonjësit e policisë kanë mbështetjen e tij dhe të qeverisë shqiptare në ushtrimin e detyrës, por u kërkoi të shmangin provokimet dhe të mos tejkalojnë kompetencat e tyre.

“Në këtë përballje me dhunë keni mbështetjen time dhe të qeverisë shqiptare për çdo veprim. Çdo dhunë ndaj policisë ka dëmtuar institucionet, pronën publike dhe private. Do të përballet me ligjin. Çdo biznes do të marrë dëmshpërblim”, u shpreh Hita.

Ai nënvizoi se përgjegjësia për veprimet e kundërligjshme është individuale, ndërsa paralajmëroi se dhuna rrezikon jetën e qytetarëve dhe dëmton institucionet.

“Veproni me përmbajtje dhe vendosmëri, mos u provokoni dhe mos u tërhiqni nga bërja e detyrës. Përgjegjësia është individuale, do të përballeni me ligjin. Ndaloni dhunën, çdo dhunë rrezikon jetën e qytetarëve”, deklaroi drejtori i Policisë së Shtetit.

Duke iu referuar të drejtës për protestë, Hita theksoi se ajo duhet të ushtrohet në mënyrë paqësore dhe brenda kufijve të ligjit. Sipas tij, policia do të vijojë të mbrojë institucionet dhe të zbatojë ligjin përballë akteve të dhunës.

“Policia nuk tërhiqet përballë dhunës, ligji do të zbatohet, institucionet do të mbrohen”, u shpreh ai.

Në përfundim, Hita e cilësoi situatën si një rast të dhunës së vazhdueshme ndaj policisë, duke theksuar se përballja me akte të tilla duhet të bëhet në përputhje me parimin e proporcionalitetit.

“Ka tejkaluar çdo veprim, dhunë e tejskajshme në qytet. Nga dhuna duhet të distancohemi”, përfundoi Skënder Hita.