Dhoma e Tregtisë dhe Industrisë Tiranë, si dhe tetë shoqata biznesi kanë shprehur shqetësimin për dëmtimin e pronës publike dhe private gjatë protestave të ditëve të fundit në kryeqytet. Në një deklaratë të përbashkët, organizatat kanë dënuar aktet e dhunës, ndërsa kanë kërkuar nga institucionet garantimin e sigurisë dhe mbrojtjen e sipërmarrjeve. Përfaqësuesit e biznesit kanë theksuar se dëmet prekin jo vetëm pronat, por edhe punonjësit, klientët dhe familjet që sigurojnë të ardhurat përmes këtyre sipërmarrjeve. Organizatat i kanë kërkuar Policisë së Shtetit të marrë masa për mbrojtjen e pronës dhe sigurisë publike, duke theksuar se ndërhyrjet duhet të jenë proporcionale dhe në përputhje me ligjin. Po ashtu, kanë kërkuar identifikimin dhe ndëshkimin individual të autorëve të akteve të dhunës, duke kundërshtuar fajësimin kolektiv të qytetarëve që ushtrojnë në mënyrë paqësore të drejtën e protestës.