Zëvendëskryeministrja Albana Koçiu bën thirrje që të ndalet dhuna në rrugët e kryeqytetit, me përshkallëzimin e fortë të protestës në ditën e tretë. Numri dy i qeverisë ngre dyshime se të rinjtë po përdoren për akte dhune nga opozita. “Të rinjtë kanë të drejtë të protestojnë, të shprehen dhe të kërkojnë një të ardhme më të mirë. Por askush nuk duhet t’i përfshijë në dhunë apo t’i përdorë për beteja politike. Në fund të ditës, çdo prind dëshiron që fëmija i tij të kthehet shëndoshë e mirë në shtëpi. Asnjë betejë politike nuk vlen më shumë se jeta, siguria dhe e ardhmja e fëmijëve tanë”. Thirrja për ndaljen e tensioneve erdhi edhe nga kreu i Kuvendit, Niko Peleshi, i cili po ashtu kërkoi dialog mes palëve. Si kryeparlamentar, dhe si student i Dhjetorit ’90, Peleshi iu drejtua me një thirrje jo vetëm protestuesve, por edhe prindërve dhe të gjitha partive politike.