Dhuna gjatë protestës, arrestohen 2 persona në Korçë dhe procedohen 23 të tjerë, 15 prej tyre të mitur

Dy persona janë arrestuar në flagrancë dhe 23 të tjerë janë proceduar penalisht pas akteve të dhunës gjatë protestës së zhvilluar më 15 tetor në qytetin e Korçës. Mes personave të proceduar, 15 janë të mitur.

Sipas Policisë, gjatë tubimit, dhjetëra pjesëmarrës, disa prej tyre të maskuar, kanë hedhur gurë, pllaka guri dhe sende të forta metalike në drejtim të institucioneve shtetërore dhe pronave publike. Gjithashtu, punonjësit e Policisë janë përballur me akte dhune dhe kundërshtim nga grupet e protestuesve.

Si pasojë e incidenteve, janë dëmtuar godinat e Bashkisë së Korçës, Drejtorisë Arsimore, universitetit “Fan S. Noli” dhe gjimnazit “Raqi Qirinxhi”. Dëmtime janë shkaktuar edhe në kangjellat e trotuareve, tabelat e reklamave dhe sinjalistikën rrugore.

Në vijim të hetimeve, në drejtimin e Prokurorisë së Korçës, janë arrestuar shtetasit F. L., 21 vjeç, banues në Voskop, dhe O. K., 19 vjeç, banues në Bilisht. Ndërkohë, 23 persona të tjerë janë proceduar penalisht, 15 prej të cilëve të mitur.

Grupi hetimor vijon punën për dokumentimin e plotë të ngjarjeve dhe identifikimin e personave të tjerë që dyshohet se janë përfshirë në akte dhune ndaj punonjësve të Policisë, institucioneve shtetërore dhe subjekteve private.