Deputetja e Partisë Demokratike, Jorida Tabaku denoncoi dhunë policore ndaj të rinjve të ndaluar pas protestës së djeshme, duke ngritur shqetësimin veçanërisht për trajtimin e 17 të miturve.
Pas një vizite në Bllokun e Sigurisë në rrugën “Mine Peza”, ku takoi të ndaluarit dhe familjarët e tyre, Tabaku deklaroi se në total janë shoqëruar 150 persona, mes tyre 17 të mitur, të cilët, sipas saj, kanë pësuar keqtrajtime dhe kanë pasur shenja të dukshme dhune në trup.
“Janë rrahur, janë tërhequr zvarrë, janë kapur vetëm duke ecur në rrugë”, u shpreh Tabaku.
Gjithashtu sipas Tabakut në ambientet e Bllokut të Sigurisë, katër persona janë detyruar të kalojnë natën mbi një dërrasë.
“Katër veta kanë kaluar gjithë natën me një dërrasë. Janë kushte çnjerëzore”, deklaroi ajo.
Tabaku:
Që në orët e para të mëngjesit kemi qenë në Bllokun e Sigurisë për të takuar të gjithë të shoqëruarit nga protesta e djeshme.
Në total janë 150 persona. Shtatëmbëdhjetë të mitur janë shoqëruar mbrëmë. Në mënyrë çnjerëzore janë rrahur, janë tërhequr zvarrë, janë kapur vetëm duke ecur në rrugë.
Mbrëmë, nëpër komisariate, kanë qenë të shtrirë në ambientet publike. Këtu, në Bllokun e Sigurisë, në paraburgim, janë nga katër veta; me një dërrasë kanë kaluar gjithë natën. Janë kushte çnjerëzore.
Nuk është kjo Shqipëria europiane. Nuk është kjo Shqipëria për të cilën të rinjtë sot po protestojnë.
Kemi ngritur një grup pune që ka monitoruar, që nga mëngjesi i ditës së parë deri në darkë, nëpër komisariate. Ka parë të gjitha kushtet në paraburgim, ka ndjekur dhe ka mbledhur evidencat e plota për të gjitha rastet e keqtrajtimit.
Kjo dosje e plotë do t’i niset çdo institucioni ndërkombëtar për çështjet e të drejtave të njeriut, në Shqipëri dhe jashtë saj.
Partia Demokratike ka qenë në terren, ka qenë në komisariate, ka qenë në spitale, ka biseduar me të gjithë, ka siguruar edhe ndihmën ligjore. Do të jemi atje për të mbrojtur të drejtat e njeriut të kujtdo.
Trajtimet çnjerëzore, trajtimet e të miturve, të cilët ishin me shenja dhune, me të nxira, me gjymtyrë të nxira, nuk kanë për të kaluar pa u denoncuar dhe pa na pasur ne në krah të tyre.
Ndërkohë që flasim, shtatëmbëdhjetë të miturit që janë këtu kanë pasur nevojë për asistencë ligjore. Kanë firmosur dokumente pa e ditur se çfarë firmosin. Nuk janë njoftuar prindërit. Janë kapur në rrugë nga forcat “Shqiponja”.
Të gjitha këto, të gjitha ato që kanë ndodhur gjatë ditës së djeshme, gjatë ditës së pardjeshme, ato që kanë ndodhur nëpër komisariate, janë shkelje të të drejtave të njeriut.
Sot, në Shqipëri, të rinjtë po protestojnë për shumë gjëra. Po protestojnë për arsimin, po protestojnë për kushte më të mira, po protestojnë që të mos largohen. Po protestojnë pikërisht për këto të drejta që u shkelen.
Çdo i ri që ka qenë atje nuk ka ushtruar asnjë akt dhune.
Më tha njëri nga të rinjtë, [emër i paqartë], atje: “Më morën dhe më arrestuan sepse po protestoja”.
Pse, në Shqipëri nuk lejohet protesta? Në Shqipëri nuk lejohet të ngresh zërin? Në Shqipëri nuk lejohet të dalësh kundër qeverisë?
Do të jemi në krah të tyre, në mbështetje të protestës, që zëri i rinisë të buçasë fort nëpër rrugë dhe, njëkohësisht, kundër këtij trajtimi çnjerëzor që ka ndodhur në paraburgim, por edhe në komisariate.
