Presidenti Donald Trump tha të enjten se Uashingtoni po zhvillon bisedime me Moskën dhe Pekinin, që synojnë denuklearizimin e vendeve që zotërojnë rezervat më të mëdha të armëve bërthamore. Sipas Institutit Ndërkombëtar të Stokholmit për Kërkime të Paqes, Rusia zotëron numrin më të madh të kokave bërthamore në rezerva, e ndjekur nga Shtetet e Bashkuara dhe Kina. Megjithatë, SHBA-ja e tejkalon Rusinë për sa i përket numrit të kokave bërthamore të vendosura në gjendje operative. Gjatë një interviste për "Neësmax", Trump u shpreh se pret që Kina "të arrijë" SHBA-në brenda pesë viteve të ardhshme. "E gjithë kjo është për të ardhur keq, sepse do të dëshiroja shumë që të realizohej denuklearizimi, nëse është e mundur. Ne po bisedojmë me Rusinë për këtë çështje, si dhe po diskutojmë me Kinën lidhur me denuklearizimin", tha më tej Trump. "Neësmax" raportoi se Trump kishte biseduar me presidentin kinez, Xi Jinping, mbi temën e denuklearizimit. Komentet e Trumpit vijnë disa muaj pasi Traktati për Reduktimin e Armëve Strategjike (START) skadoi në fillim të këtij viti. Traktati i Neë START, i nënshkruar në vitin 2010, parashikonte mundësinë e një zgjatjeje të vetme; një zgjatje e tillë pesëvjeçare u ra dakord midis presidentit Joe Biden dhe presidentit rus, Vladimir Putin. Çdo zgjatje e re do të kërkonte një vendim ekzekutiv për të zgjatur vullnetarisht kufizimet e përcaktuara në traktat.