Kreu i grupit parlamentar të Partisë Socialiste, Taulant Balla, ka publikuar disa mesazhe që, sipas tij, po qarkullojnë në grupet online të komunikimit mes studentëve dhe ku bëhen thirrje për pajisjen me thika dhe sulmin ndaj punonjësve të Policisë së Shtetit.
Në reagimin e tij, Balla ngriti pikëpyetje mbi mënyrën se si po gjykohen ndërhyrjet e policisë gjatë protestave, duke theksuar se çdo veprim i efektivëve po vlerësohet me kujdes të shtuar.
“Çdo ndërhyrje e Policisë po shikohet me lupë dhe po i bëhet gjyqi menjëherë! Po si duhet të sillet Policia me elementët kriminalë të maskuar si studentë?”, shkroi Balla.
Ai iu referua edhe një grupi komunikimi në WhatsApp, për të cilin tha se ishte përmendur nga një studente një natë më parë. Sipas Ballës, në këtë grup pretendohet se janë dhënë porosi për të marrë thika dhe për të sulmuar punonjësit e policisë.
Deri në informacionin e bërë publik, mesazhet e publikuara nga Balla paraqiten si pretendime të tij dhe nuk ka të dhëna të tjera në materialin e publikuar që të konfirmojnë në mënyrë të pavarur përmbajtjen apo autorësinë e tyre.
