Protestuesit komunikojnë paqësisht me efektivët: Nuk e kemi me ju, na i bëni hallall për çdo gur…

Gjatë protestës së sotme, e cila vijon prej orëve të mëngjesit, është vënë re një moment i veçantë mes protestuesve dhe forcave të Policisë së Shtetit.

Pavarësisht thirrjeve të forta të protestuesve në drejtim të efektivëve, në disa momente janë zhvilluar edhe biseda të drejtpërdrejta mes dy palëve, me komunikim të qetë dhe pa përplasje tek bulevardi “Dëshmorët e Kombit”.

Një prej protestuesve, i maskuar, i është drejtuar një efektivi të policisë, duke i thënë se zemërimi i tyre nuk është ndaj uniformave blu, por ndaj kryeministrit Edi Rama.

“Duam t’ju themi vetëm që nuk e kemi me ju. Na i bëni hallall për çdo gur. Çdo gur ndaj jush është ndaj Edi Ramës. As nuk ju njohim, as nuk e dimë se kush jeni. Ju kemi të gjithëve miq e shokë”, është shprehur protestuesi.

Ndërkohë, një tjetër protestues është parë duke komunikuar me një efektiv, të cilit i është drejtuar me këshillën që të heqë uniformën.

“Nëse e hiqni uniformën, do bëni më mirë. Mendimi im, ju bëni si të doni. Ju respektojmë”.

Këto momente janë shënuar mes tensioneve që kanë shoqëruar protestën, ku protestuesit vijojnë të qëndrojnë përballë forcave të policisë.