Shitja e modelit kinez Chery Omoda 5 është ndaluar përkohësisht në Malajzi, pasi një defekt teknik në sistemin e pezullimit mund të rrezikojë sigurinë e drejtuesve dhe pasagjerëve.
Të lidhura
None found
Vendimi i Departamentit Malajzian të Transportit Rrugor u bë publik më 11 tetor, pas qarkullimit në rrjetet sociale të fotografive të një Omoda 5, së cilës i ishte shkëputur pjesa e pasme e sistemit të pezullimit.
Pas incidentit, autoritetet pezulluan edhe miratimin për homologimin e automjetit dhe nisën procedurat hetimore për të zbuluar shkaqet e problemit.
Chery ka pranuar se automjetet mund të kenë një defekt teknik dhe u ka kërkuar pronarëve të modeleve potencialisht të prekura t’i paraqesin ato në serviset e autorizuara për verifikime të mëtejshme.
Sipas prodhuesit, çështja prek versionet e mëparshme të Omoda 5, të prodhuara përpara ridizajnimit. Pronarët mund të verifikojnë nëse automjetet e tyre bëjnë pjesë në serinë e prekur përmes numrit identifikues të automjetit, ose VIN-it.
Ngjarja ka ngritur pikëpyetje mbi sigurinë dhe standardet e kontrollit të cilësisë së automjeteve të Chery-t, një kompani që vitet e fundit ka zgjeruar praninë dhe popullaritetin e saj në tregun malajzian.
Ky është rasti i dytë i ngjashëm që lidhet me kompaninë. Në vitin 2024, Chery tërhoqi vullnetarisht 600 automjete Omoda 5 për shkak të një defekti të mundshëm në boshtin e pasmë, i shkaktuar nga një problem me saldimin. Verifikimet e kryera më pas treguan se defekti kishte prekur 60 automjete.
Chery është kritikuar gjithashtu për mënyrën e reagimit ndaj incidentit të fundit, pasi pamjet e automjetit të dëmtuar u publikuan disa ditë përpara se kompania të jepte një përgjigje zyrtare.
Hetimi i autoriteteve malajziane pritet të përcaktojë nëse problemi paraqet rrezik për një numër më të madh automjetesh dhe nëse do të nevojiten masa shtesë për këtë model.
