Partia Demokratike kërkon dorëheqjen e menjëhershme të kryeministrit Edi Rama, krijimin e një qeverie kujdestare dhe arrestimin e Belinda Ballukut. Në një deklaratë për mediat, PD kundërshton përfshirjen e Presidentit Bajram Begaj në konsultimet për zgjidhjen e krizës politike, duke e akuzuar atë për bashkëpërgjegjësi në afera me pronat e ushtrisë.
Sipas Partisë Demokratike, kriza e legjitimitetit të qeverisë nuk mund të zgjidhet pa plotësimin e kërkesave të studentëve dhe gjimnazistëve të Tiranës, si dhe të opozitës. PD rendit tri kërkesa kryesore: dorëheqjen e menjëhershme të Edi Ramës dhe krijimin e një qeverie kujdestare me mandat për përgatitjen e zgjedhjeve sipas standardeve ndërkombëtare; heqjen e imunitetit dhe arrestimin e Belinda Ballukut, si dhe të çdo politikani për të cilin organet e drejtësisë kërkojnë ndjekje penale për korrupsion.
Në deklaratë, opozita paralajmëron se nuk do të njohë asnjë negociatë apo marrëveshje që bie ndesh me këto kërkesa ose që, sipas saj, synon të zgjasë qëndrimin e Edi Ramës në pushtet. Partia Demokratike e konsideron plotësimin e këtyre kushteve të panegociueshëm për zgjidhjen e krizës politike në vend.
Deklarata e plotë
Lajme të mediave të ndryshme informojnë se kukulla e Edi Ramës, Bajram Begaj, me porosi të bosit të tij ka filluar takimet dhe konsultimet për zgjidhjen e krizës, element keqësues i së cilës është edhe ai vetë.
Begaj është bashkautor me Padrinon në afera të mëdha vjedhjesh klamoroze të pronave të ushtrisë dhe për këtë bashkëvjedhje u shpërblye me postin që mban dhe kërkon tashmë jo të zgjidhë, por të thellojë edhe më tej krizën, pavarësisht nga pasojat katastrofale të saj në vend.
Ndaj, në këto momente kritike për vendin, Partia Demokratike deklaron se: Zgjidhja e krizës së rëndë të mungesës së legjitimitetit të qeverisë aktuale të krimit ka si kusht themelor dhe të panegociueshëm plotësimin e menjëhershëm të kërkesave të revoltës së studentëve e gjimnazistëve të Tiranës, si dhe të Partisë Demokratike e mbarë Shqipërisë:
1. Dorëheqjen e menjëhershme të Edi Ramës.
Krijimin e një qeverie kujdestare me mandat përgatitjen e zgjedhjeve sipas standardeve ndërkombëtare.
2. Heqjen e menjëhershme të imunitetit dhe arrestimin e Lubi Ballukut e cilitdo politikani që kërkojnë për veprën penale të korrupsionit organet e drejtësisë!
3. Partia Demokratike deklaron se ajo nuk do të njohë asnjë lloj negociate apo marrëveshjeje që bie ndesh me kërkesat e mësipërme apo që kërkon t’i zgjasë jetën Edi Ramës, kufomë e pakallur politike.