Një propozim politik i drejtohet kryeministrit Edi Rama nga Günther Fehlinger-Jahn, kreu i Komitetit Austriak për Zgjerimin e NATO-s, i cili i kërkon të largohet nga drejtimi i qeverisë shqiptare, të tërhiqet përfundimisht nga politika dhe të vendoset në Vjenë.
Në reagimin e tij publik, Fehlinger-Jahn sugjeron që Austria të shqyrtojë mundësinë e një marrëveshjeje të negociuar me Ramën, me synimin për t’i dhënë fund krizës politike dhe për të hapur rrugën drejt një tranzicioni paqësor në Shqipëri.
Largim nga pushteti dhe tërheqje nga politika
Sipas propozimit, marrëveshja do të përfshinte dorëheqjen e menjëhershme të Ramës, largimin e tij të përhershëm nga Shqipëria dhe vendosjen në Vjenë, në përputhje me ligjet austriake.
Fehlinger-Jahn kërkon gjithashtu që kryeministri të angazhohet publikisht se nuk do të rikthehet më në politikë dhe nuk do të ndërhyjë në zhvillimet politike të vendit.
Në nismën e tij përmendet edhe mundësia e negociimit të mbrojtjes ligjore nga ndjekja penale apo dënimi, por vetëm brenda kufijve që përcakton legjislacioni.
Fehlinger-Jahn nënvizon se një marrëveshje e tillë nuk mund të garantojë imunitet për vepra penale për të cilat ligji nuk lejon amnisti.
Megjithatë, ai e bën të qartë se kjo është një ide e propozuar prej tij dhe jo një marrëveshje e arritur me Ramën apo një ofertë zyrtare e autoriteteve austriake.
Zgjedhje të besueshme dhe garanci për procesin demokratik
Propozimi nuk kufizohet vetëm te largimi i kryeministrit. Fehlinger-Jahn kërkon që çdo zgjidhje politike të shoqërohet me masa për garantimin e zgjedhjeve të besueshme, ku vullneti i qytetarëve të reflektohet në rezultatin përfundimtar.
Në këtë kuadër, ai përmend vëzhgimin e pavarur ndërkombëtar, aksesin e barabartë në media dhe transparencën gjatë numërimit të votave.
Sipas tij, një marrëveshje e negociuar duhet të ndihmojë në uljen e tensioneve dhe t’i japë fund përplasjeve, pa cenuar të drejtën e qytetarëve për protesta paqësore.
“Edi Rama duhet të japë dorëheqjen dhe të deklarojë publikisht se nuk do të kandidojë më. Në këmbim, një marrëveshje e negociuar duhet t’u japë fund protestave dhe dhunës në rrugë, duke garantuar njëkohësisht të drejtën për tubime paqësore”, shkruan Fehlinger-Jahn.
Thirrja e drejtpërdrejtë për Ramën
Në përfundim të reagimit, Fehlinger-Jahn i drejtohet drejtpërdrejt kryeministrit shqiptar, duke e paraqitur largimin nga pushteti si një mundësi për të hapur një kapitull të ri politik për Shqipërinë.
“Edi Rama, prano marrëveshjen e Vjenës! Jep dorëheqjen, tërhiqu dhe lëre Shqipërinë të ecë përpara”, përfundon ai.
Sipas Fehlinger-Jahn, vendi ka nevojë për një tranzicion demokratik paqësor dhe për hapa konkretë drejt integrimit evropian.
Postimi i plote
OFERTA IME PËR EDI RAMËN: JEP DORËHEQJEN DHE TËRHIQU NGA JETA PUBLIKE NË VJENË!
Pas 13 vitesh në pushtet, ka ardhur koha që Edi Rama të largohet nga detyra!
I bëj thirrje Austrisë t’i ofrojë Edi Ramës një marrëveshje të negociuar për largimin nga politika — një lloj marrëveshjeje që ndonjëherë u ofrohet sundimtarëve autoritarë për të lehtësuar një tranzicion paqësor.
TË JAPË MENJËHERË DORËHEQJEN si Kryeministër i Shqipërisë!
TË LARGOHET PËRGJITHMONË NGA SHQIPËRIA dhe të mos kthehet më kurrë!
TË TËRHIQET NGA JETA PUBLIKE NË VJENË, me qëndrim të sigurt dhe të ligjshëm sipas ligjeve austriake!
PA MARRËVESHJE PËR MOSNDËSHKIM — të negociojë mbrojtje nga ndjekja penale dhe dënimi në masën maksimale të lejuar me ligj, pa imunitet për krimet që nuk mund të përfshihen ligjërisht në një amnisti!
TË MOS KTHEHET KURRË NË POLITIKË — pa rikthim, pa ndërhyrje dhe pa pushtet politik!
🇦🇹 Vjena mund t’i ofrojë Edi Ramës një tërheqje paqësore nga jeta publike. 🇦🇱 Shqipëria duhet të jetë e lirë të zgjedhë të ardhmen e saj demokratike!
Kjo është propozimi im politik, jo një marrëveshje ekzistuese apo garanci për imunitet.
EDI RAMA: PRANO MARRËVESHJEN E VJENËS! JEP DORËHEQJEN, TËRHIQU DHE LËRE SHQIPËRINË TË ECË PËRPARA!
