Një shpërthim me tritol është regjistruar në orët e para të mëngjesit në fshatin Llakatund të Vlorës. Lënda plasëse dyshohet se i është vendosur automjetit të shtetasit I. B., 29 vjeç, administrator i njësisë administrative Shushicë.
Sipas informacionit paraprak të Policisë, ngjarja është konstatuar rreth orës 02:50. Automjeti ishte i parkuar pranë banesës së 29-vjeçarit, i cili është banues në Shushicë.
Grupi hetimor ndodhet në vendngjarje dhe po punon për zbardhjen e plotë të rrethanave, dokumentimin ligjor të rastit, si dhe identifikimin dhe kapjen e autorit ose autorëve të dyshuar.
Deri më tani, policia nuk ka dhënë detaje të tjera lidhur me motivet e mundshme të shpërthimit.
