'95% e studentëve jashtë nuk duan të kthehen'/ Çeno: Qeveria Rama ka dështuar të mbajë të rinjtë në Shqipëri

I ftuar në emisionin “Kafe Shqeto” në Syri TV, Enri Çeno, sekretar për Marrëdhëniet me Jashtë në PD, akuzoi qeverinë Rama për mosmbajtjen e premtimeve për arsimin, ndërsa paralajmëroi për pasojat e emigrimit masiv të të rinjve.

Duke iu referuar të dhënave të Barometrit për Ballkanin, Çeno theksoi se 79% e studentëve e shohin emigrimin si mundësinë e vetme, ndërsa 95% e studentëve shqiptarë që studiojnë jashtë nuk shohin mundësi për t'u kthyer në vend.

Ai kujtoi se Edi Rama erdhi në pushtet në vitin 2013 me premtimin për të rritur financimin e arsimit në 5% të PBB-së, por, sipas të dhënave të përmendura në intervistë, financimi sot është vetëm 2.9%.

Çeno u ndal edhe te protestat e studentëve, duke theksuar se ata kanë dalë në rrugë për të kërkuar kushte më të mira dhe se mungesa e dëgjimit të kërkesave të tyre ka ndikuar në përshkallëzimin e protestës.

Pjesë nga intervista:

Nga informacionet që kemi dhe nga kontaktet tona të përditshme gjatë gjithë javës, kur janë zhvilluar protestat në rrugët e Tiranës, kemi pasur kontakt të vazhdueshëm me kolegët tanë, me deputetë gjermanë, deputetë francezë, deputetë italianë, me përfaqësues të Kongresit Amerikan, me përfaqësues të ambasadave këtu, për të kuptuar më tepër dhe për të marrë më shumë informacion, ndryshe nga ai që mund të transkriptohet e të kalojë nëpërmjet institucioneve shtetërore shqiptare.

Kemi parë edhe reagimet, në fakt, të trupit diplomatik të atashuar në Tiranë, që ka bërë disa reagime që janë brenda formatit diplomatik. Sigurisht, ata nuk mund të shtyhen përtej formatit.

Ne kemi parë edhe reagimin e ambasadës këtu, por, nga ana tjetër, përfaqësues të ambasadës amerikane janë në kontakt të vazhdueshëm si me njerëz të opozitës, ashtu edhe me persona zyrtarë të shtetit shqiptar, pra, njerëz të lidhur me qeverinë. Nga krahu tjetër, jam munduar të marr informacione edhe nga vetë studentët. Nga kontaktet që unë kam pasur me ta, i kam këshilluar të kontaktojnë edhe vetë përfaqësues të studentëve.

Vetë kjo protestë, në njëfarë mënyre, është e pastrukturuar, pra, nuk ka një linjë të mirëfilltë lidershipi. Është shumë naive në vetvete kjo protestë, për shkak edhe të mënyrës se si është krijuar. Janë studentët që kanë dalë në rrugë dhe po protestojnë. Pas 135 ditësh në të qetë, janë kthyer në të dhunshëm për të dëgjuar zërin e tyre. Aty ka probleme të jashtëzakonshme.

Jo më larg se dje, po lexoja disa statistika të Barometrit për Ballkanin, ku thuhet se 44 për qind e shqiptarëve sot e shohin si suksesin e vetëm emigrimin. Nga kjo rezulton se 79 për qind e studentëve e shohin si mundësinë e vetme emigrimin dhe, nga krahu tjetër, 95 për qind e studentëve shqiptarë që studiojnë në shtetet e huaja nuk shikojnë asnjë mundësi për t'u rikthyer në Shqipëri.

Ne mund ta kuptojmë edhe arsyen se pse këta studentë kanë dalë në rrugë duke ngritur zërin e tyre, duke u kthyer, në njëfarë mënyre, edhe në të dhunshëm.

Nga krahu tjetër, ata kërkojnë kushte më të mira. Ne nuk duhet të harrojmë faktin që, sipas disa statistikave të tjera, sot qeveria shqiptare investon 2.9 për qind të buxhetit, pra, të PBB-së, në arsim. Ne duhet të kujtojmë këtu që, në vitin 2013, Edi Rama erdhi me premtimin se do të arrinim në nivelin e 5 përqindëshit, aq sa është sot edhe mesatarja e vendeve të Bashkimit Evropian.