Sulmuesi i Tottenhamit, Richarlison, ka ngritur akuza të forta ndaj senatorit brazilian Flávio Bolsonaro, djali i ish0presidentit Jair Bolsonaro, i cili synon presidencën e Brazilit, duke pretenduar se ai ka marrë në zotërim ishullin e tij privat pa i paguar asnjë shumë parash.

Në një video të publikuar së fundmi, futbollisti brazilian ka rrëfyer konfliktin për pronësinë e ishullit në Angra dos Reis, në zonën e Costa Verde, në Rio de Janeiro. Sipas Richarlisonit, ai e kishte blerë pronën mes viteve 2020 dhe 2021 dhe kishte marrë disa oferta për ta shitur, përfshirë edhe një nga Flávio Bolsonaro, të cilën e kishte refuzuar.

“Unë nuk doja t’ia shisja ishullin atij. Meqë nuk pranova, ata përfituan nga situata në gjykatë. Po përpiqeshim të zgjidhnim dokumentacionin e pronësisë dhe na thanë se kjo mund të zgjaste muaj apo edhe vite”, deklaroi sulmuesi.

Më tej, Richarlison pretendon se senatori dhe një person i quajtur Willer Tomaz arritën të merrnin kontrollin e ishullit brenda vetëm 24 orëve.

“Flávio Bolsonaro dhe ky person shkuan atje dhe, brenda 24 orëve, morën në zotërim ishullin. Pikërisht aty dështoi sistemi i drejtësisë. Sipas asaj që di unë, ata e morën ishullin pa shpenzuar asnjë qindarkë. Unë investova rreth 10 milionë realë brazilianë dhe nuk mora asgjë”, u shpreh futbollisti.

Richarlison u ka kërkuar autoriteteve policore të hetojnë çështjen dhe të zbardhin fatin e parave që pretendon se ka investuar. Ai gjithashtu u ka bërë thirrje ndjekësve të tij në rrjetet sociale që të kërkojnë shpjegime nga Bolsonaro.

Deri në zbardhjen e plotë të çështjes, pretendimet e sulmuesit mbeten akuza të tij dhe nuk përbëjnë një fakt të provuar përfundimisht.

Problemet jashtë fushës i shtohen situatës së vështirë sportive

Ky konflikt vjen në një periudhë të trazuar për Richarlisonin, i cili ka pasur përplasje publike edhe me drejtuesit e Tottenhamit dhe trajnerin Roberto De Zerbi.

Sulmuesi kishte pretenduar se klubi londinez ishte përpjekur ta shiste tek ish-skuadra e tij, Everton, pa miratimin e tij. I pakënaqur me mënyrën se si ishte trajtuar çështja e së ardhmes së tij, braziliani reagoi në rrjetet sociale, duke deklaruar se nuk do të lejonte më që të tjerët të vendosnin për karrierën e tij.

Ndërkohë, ai është lënë jashtë planeve të ekipit të parë dhe së fundmi ka luajtur me skuadrën U-21 të Tottenhamit, ku shënoi kundër Cheltenham Town në kuadër të EFL Trophy.

Kështu, Richarlison gjendet në qendër të vëmendjes për dy çështje të ndryshme: konfliktin e pretenduar për pronësinë e ishullit në Brazil dhe të ardhmen e tij të pasigurt tek Tottenham.