Rama kërcënon shqiptarët: I them familjeve të atyre të miturve, do të paguani

Kryeministri Edi Rama ka ashpërsuar qëndrimin ndaj protestuesve, duke i shtrirë paralajmërimet edhe te familjet e të miturve dhe studentët që marrin pjesë në tubime. Gjatë një takimi me përfaqësues të Policisë së Shtetit, kreu i qeverisë deklaroi se personat që, sipas tij, janë përfshirë në një plan për të nxitur dhunë, do të përballen me pasoja financiare dhe administrative.

Në fokus të deklaratave të tij ishin prindërit e të miturve që marrin pjesë në protesta, si dhe studentët që mungojnë në mësim për t’u përfshirë në përplasjet me policinë. Rama paralajmëroi se familjet mund të përballen me fatura financiare, ndërsa për studentët foli për masa që mund të ndikojnë në vijimin normal të studimeve dhe përfitimin nga arsimi falas.

“Kush i është vënë këtij plani, do ta paguajë”

Kryeministri u drejtua drejtpërdrejt familjeve të të miturve, duke deklaruar se ato duhet të mbajnë përgjegjësi nëse nuk kujdesen për fëmijët e tyre dhe i lejojnë të përfshihen në situata të dhunshme.

“Kush i është vënë këtij plani, do ta paguajë. I them familjeve të atyre të miturve, do të paguani, në rast se nuk do të mbani përgjegjësi për ata fëmijë. Nëse nuk dini t’i mbroni dhe i lini rrugëve, dhe nuk bëni rolin e mburojës së atyre që janë pas, fatura financiare do ju ndjek deri në fund”, deklaroi Rama.

Me këtë qëndrim, kreu i qeverisë paralajmëroi se pasojat e protestave mund të shtrihen edhe te prindërit e të miturve. Megjithatë, në deklaratën e tij nuk u specifikuan shumat që mund të kërkohen, baza ligjore apo procedurat përmes të cilave do të përcaktohej përgjegjësia financiare e familjeve.

Rama paralajmëron masa administrative për studentët

Një tjetër pjesë e deklaratave iu kushtua studentëve që, sipas kryeministrit, braktisin procesin mësimor për t’u përfshirë në akte dhune ndaj efektivëve të policisë.

Rama paralajmëroi se kthimi i tyre në universitet nuk do të bëhet pa pasoja administrative, duke e lidhur pjesëmarrjen në akte të tilla me mundësinë e penalizimeve nga institucionet arsimore.

“Ju them studentëve që ikin nga shkolla për të dhunuar policinë, s’do të kthehen në shkollë normalisht pa pasoja administrative për ta”, u shpreh kryeministri.

Deklarata ngre pikëpyetje mbi llojin e masave që mund të ndërmerren ndaj studentëve dhe procedurat që do të ndiqen për zbatimin e tyre. Deri në këtë fazë, nuk janë bërë të ditura hollësi konkrete mbi universitetet që mund të përfshihen apo natyrën e penalizimeve të paralajmëruara.

“Nuk do të ketë arsim falas për ata studentë që dalin dhe dhunojnë policinë”

Pjesa më e fortë e paralajmërimit të Ramës lidhej me financimin e studimeve universitare. Kryeministri deklaroi se studentët që përfshihen në akte dhune ndaj policisë nuk duhet të përfitojnë nga arsimi falas.

“Nuk do të ketë arsim falas për ata studentë që dalin dhe dhunojnë policinë”, tha ai.

Kjo deklaratë e lidh drejtpërdrejt pjesëmarrjen në akte të dhunshme me përfitimet arsimore, por nuk shoqërohet me një sqarim mbi mënyrën se si do të zbatohej një masë e tillë apo nëse ekziston një procedurë konkrete për heqjen e financimit të studimeve në këto raste.

Paralajmërimet e kryeministrit vijnë në një klimë të tensionuar, pas disa ditësh protestash dhe përplasjesh në Tiranë. Ndërsa qeveria thekson nevojën për përgjegjësi ndaj akteve të dhunshme, deklaratat për penalizimin e familjeve dhe kufizimin e përfitimeve arsimore e zhvendosin debatin edhe te pasojat që mund të kenë këto masa për të miturit, studentët dhe të drejtën për arsim.