Një nga postimet e Gilpin për protestat në Tiranë
Filip Gilpin, një qytetar amerikan në Tiranë u ndalua dhe u mor në pyetje nga policia shqiptare në sheshin Skënderbej. Ai ka lajmëruar ambasadën amerikane për ndalimin e paligjshëm ndërkohë do të flasë edhe me përfaqësuesit e tij në Kongresin Amerikan.
RRËFIMI/ Emri im është Philip Gilpin Jr. dhe jam shtetas amerikan në Shqipëri. Sot në mëngjes, rreth orës 11:00, po kthehesha në apartamentin tim pranë qendrës, pasi kisha takuar një agjent imobiliar për të parë disa ambiente të mundshme për zyra.
Teksa po kaloja në sheshin kryesor, kalova pranë një grupi prej pesë adoleshentësh që po bisedonin. Përshëndeta me dorë njërin prej tyre dhe nisëm të flisnim. Një bisedë e thjeshtë: “Përshëndetje, si je?”
Rreth tre minuta më vonë, një grup prej afro 10 personash pa uniformë, të veshur tërësisht me të zeza dhe të pajisur me shkopinj gome, vrapuan drejt nesh, na kapën fizikisht dhe na ndaluan të gjithëve. Adoleshentët u shoqëruan në një drejtim tjetër, ndërsa unë u mbajta për t’u marrë në pyetje nga dy “oficerë”.
Njëri më kapi nga kyçi i dorës, më mori telefonin dhe nisi ta kontrollonte. Tjetri më kërkoi dokumentin e identifikimit. I thashë se jam amerikan, nga Bostoni, dhe i tregova lejen time amerikane të drejtimit të automjetit.
Ata fotografuan lejen e drejtimit dhe më bënë një fotografi edhe mua. Pas rreth 10 minutash, gjatë të cilave u përpoqën të më frikësonin, më lanë të lirë.
Vlen të theksohet gjithashtu se kam qenë dëshmitar i tre incidenteve të tjera, ku grupe të vogla personash që i cilësoj si banditë lëviznin nëpër shesh dhe ndalonin çdo të ri që gjenin. Të gjitha këto ngjarje ndodhën brenda një zone që mund të përshkohet në këmbë për 15 minuta.r.k
