I dërguari special i Presidentit amerikan Donald Trump, Richard Zampolli, ka zhvilluar një vizitë në Kryegjyshatën Botërore Bektashiane në Tiranë, në kuadër të aktiviteteve për 35-vjetorin e rihapjes së Selisë së Shenjtë.
Gjatë vizitës, një prej temave të diskutuara ishte edhe projekti për krijimin e një shteti sovran të Urdhrit Bektashi në Shqipëri. Zampolli u shpreh se vendimmarrja për këtë çështje duhet të jetë në dorë të popullit shqiptar.
“Unë po mësoj nga ju dhe mendoj se populli shqiptar e dëshiron këtë; pra, është gjë e mirë nëse populli juaj e dëshiron. Dëgjova disa njerëz të flisnin, por ndoshta jo popullin në tërësi. Pra, populli duhet të shprehet”, tha ai,, transmrton Rtsh.
Zampolli e përsëriti qëndrimin e tij edhe pas takimeve me përfaqësues të dy grupeve të mëdha parlamentare, Partisë Socialiste dhe Partisë Demokratike, duke deklaruar se SHBA do të mbështesin çdo vendimmarrje që do të merret për këtë çështje.
Vizita në Tiranë përkoi me 35-vjetorin e rikrijimit të Kryegjyshatës Botërore Bektashiane, e cila organizoi një konferencë jubilare me këtë rast.
Gjatë qëndrimit në Shqipëri, i dërguari amerikan njoftoi gjithashtu se, në bashkëpunim me Kryegjyshatën Botërore Bektashiane, po shqyrtohet mundësia e krijimit të një qendre të avancuar shëndetësore në Shqipëri.
Sipas Zampollit, projekti do të lidhet me programet dhe nismat e administratës së Presidentit amerikan Donald Trump.a.b
