Arben Ahmetaj plas përgjimin “bombë”

Ish-zëvendëskryeministri Arben Ahmetaj ka publikuar një audiopërgjim gjatë intervistës ekskluzive në emisionin “Çim Peka LIVE”, duke ngritur akuza të forta lidhur me gazin e Delvinës dhe mënyrën se si, sipas tij, po tentohet të administrohet kjo pasuri.

Në audiopërgjim dëgjohet izraelito-shqiptari Ron Yefet, në një bisedë me dy persona të tjerë, njëri ukrainishtfolës dhe tjetri rusishtfolës. Ahmetaj pretendon se personat e përfshirë në këtë komunikim po tentojnë të marrin kontrollin mbi gazin e Delvinës.

Sipas ish-zëvendëskryeministrit, në një moment të audiopërgjimit Ron Yefet shprehet se “Qeveria shqiptare më ka pajtuar për të bërë të gjitha gjërat e këqija”.

Ahmetaj e lidhi këtë episod me atë që ai e cilëson si “konceptin KAYO”, duke pretenduar se përmes krijimit të kompanive të caktuara dhe marrëdhënieve të tyre me shtetin po ndërtohet një mekanizëm që mund të çojë në përdorimin e parave publike dhe pasurive shtetërore pa procedura transparente.

Ahmetaj: “Po tentohet të grabitet Delvina”

Gjatë bisedës me gazetarin Çim Peka, Ahmetaj tha se personat që ai përmendi kanë muaj që, sipas tij, po tentojnë të marrin gazin e Delvinës dhe ta kalojnë nën kontrollin e Ron Yefetit.

ARBEN AHMETAJ: Është interesante. Është midis Ron Yefetit dhe dy qytetarëve, ukrainishtfolës dhe rusishtfolës. Njëri prej tyre e ka emrin Igor, por këta nuk janë fokusi im.

Bëhet fjalë për grabitjen e Delvinës me të njëjtin koncept, konceptin KAYO. Shqiptarët duhet ta dinë që kreu i organizatës së bashku me plaçkitësen kanë më shumë se 9-10 muaj që tentojnë të grabisin Delvinën për t’ia dhënë Ron Yefetit.

Ahmetaj vijoi duke shpjeguar mënyrën se si, sipas tij, funksionon skema që ai e quan “koncepti KAYO”.

ARBEN AHMETAJ: Koncepti KAYO është: shteti krijon një kompani, siç ka krijuar KAYO-n. Dhe pastaj këtu fillojnë gjithë këto joint venture, me 80% privatët dhe 20% shteti i shkretë. Devijojnë paratë e buxhetit të shtetit dhe shërbimet pa tender, sipas tij, drejt kompanive bija të KAYO-s.

Ish-zëvendëskryeministri përmendi edhe kompaninë Timak Defense, duke pretenduar se bëhet fjalë për një strukturë që, sipas tij, ka përfituar fonde nga buxheti i shtetit.

Ai u bëri gjithashtu thirrje deputetëve socialistë që kanë votuar ligjin për KAYO-n që, sipas tij, të reflektojnë për pasojat e këtij modeli.

ARBEN AHMETAJ: Do ta shikojmë tek Timak Defense. Këto janë krijesa të Edi Ramës. I lutem deputetëve të partisë time që votuan ligjin e KAYO-s, të mos e ulin kokën, se po ju vjen ligji tjetër në shëndetësi.

Ahmetaj përmend një tjetër marrëdhënie me një shtetas izraelit

Në vijim të intervistës, Ahmetaj përmendi edhe një tjetër shtetas izraelit, të cilin e lidhi me një projekt në sektorin e shëndetësisë.

Sipas tij, bëhet fjalë për një model të ngjashëm me atë që ai e cilëson si “koncepti KAYO”, ndërsa pretendoi se në këtë rast do të realizoheshin shërbime pa tender.

ARBEN AHMETAJ: Është tjetër izraelit ky. Është influenca e Ron Yefetit. Këtu bëhet fjalë që të grabitet Delvina, madje aty i thotë: “Nuk keni nevojë për para, ndërtoni pak pjesën teknike se s’ka hedhur asnjë cent”.

Ahmetaj përmendi në këtë kontekst edhe Ermal Raketa, për të cilin tha se fillimisht kishte mbajtur detyrën e zëvendëssekretarit të përgjithshëm, më pas ishte bërë kryetar i bordit të KAYO-s dhe më vonë ministër i Mbrojtjes.

Sipas Ahmetajt, ky emër është një pseudonim që përdoret brenda Forcave të Armatosura.

ARBEN AHMETAJ: Ermal Raketa është pseudonimi që Forcat e Armatosura i referohen ministrit të tyre. Nga brenda më ka ardhur. Kur kreu i organizatës i ka thënë: “Ermal, ti po më zhgënjen”, Ermali çohet në këmbë dhe i thotë: “Unë për ty bëj dhe raketë!”. E firmos. Dhe Forcat e Armatosura tash kanë filluar i thonë Ermal Raketa.

Ahmetaj: “Paratë e buxhetit po u shkojnë miqve dhe klientëve”

Në pjesën tjetër të intervistës, ish-zëvendëskryeministri deklaroi se do të ndjekë transfertat financiare dhe mënyrën se si, sipas tij, po përdoren paratë publike.

Ai akuzoi qeverinë se po kalon fonde te kompani të caktuara pa procedura tenderimi, duke e cilësuar këtë si një strukturë që mund të ketë pasoja afatgjata për ekonominë dhe financat publike.

ARBEN AHMETAJ: Tani do shohim transfertat, paratë e shqiptarëve si u shkojnë miqve, klientëve dhe kreut të organizatës.

Ahmetaj u ndal sërish te Timak Defense, duke pretenduar se kompania ka marrë miliarda lekë paradhënie nga buxheti i shtetit, ndërsa sipas tij nuk ka kryer investime të mjaftueshme nga kapitali i vet.

ARBEN AHMETAJ: Tani shikoni Timak Defense, pasqyrën financiare. Kanë marrë nga buxheti i shtetit miliarda lekë paradhënie pa pasur asnjë investim nga vetë kapitali i tyre. Është një kancer në trupin e shtetit.

Pretendimet për tenderat dhe trafikun e armëve

Në vijim, biseda u zhvendos edhe te pretendimet për trafik armësh. Ahmetaj tha se në komunikimet e publikuara përmenden tenderat dhe pretendoi se ekzistojnë raste që, sipas tij, meritojnë hetim të mëtejshëm nga gazetarët investigativë.

Ai përmendi konkretisht një rast të kapjes së një furgoni me raketa në Itali dhe sugjeroi që gazetarët të hetojnë nëse ekziston ndonjë lidhje me Shqipërinë.

ARBEN AHMETAJ: Unë i ftoj gazetarët investigativë, shihni pak atë rastin kur në Itali u kap një furgon me raketa. Mund të zbuloni mbrapa gjëra shumë interesante të trafikut të armëve nga Greqia për në Shqipëri.

Ahmetaj e lidhi këtë pretendim me atë që ai e cilësoi si një strukturë më të gjerë ekonomike, e cila, sipas tij, synon të krijojë kontroll mbi sektorë të rëndësishëm të ekonomisë shqiptare.

ARBEN AHMETAJ: Kjo strukturë kriminale bëhet që nesër të ketë në dorë aortën ekonomike të vendit dhe t’ia shtrëngojë fytin çdo qeverie që vjen nesër.

“Roni gjithmonë flet për pa tendera”

I pyetur nga Çim Peka për mënyrën se si funksionon mekanizmi që ai përmendi, Ahmetaj përsëriti pretendimin se fondet publike po kalojnë përmes procedurave që, sipas tij, shmangin tenderat.

ARBEN AHMETAJ: Është vazhdimi i logjikës së trafikut të armëve. Dhe po ta dëgjosh, prapë i referohet tenderave. Ky, Roni, gjithmonë flet për pa tendera, sepse kreu i organizatës ia kalon paratë, do t’i shohim më pas, dhe paradhënie, pa tender.

Sipas tij, krijimi i strukturave të tilla do të mund t’i jepte një ndikim të madh kompanive private ndaj qeverive të ardhshme.

ARBEN AHMETAJ: Që praktikisht nesër t’i ketë në dorë këto kompani private dhe nesër një qeveri që do vijë, e dalë nga vullneti i popullit, të mos ketë mundësi të qeverisë Shqipërinë, se ky do ketë në dorë aortën ekonomike të vendit.

Ahmetaj e vijoi argumentin duke e cilësuar këtë si një rrezik për financat publike dhe për çdo qeveri që mund të vijë në të ardhmen.

Në fund të kësaj pjese të intervistës, ai iu rikthye edhe një herë rastit të raketave të kapura në Itali, duke u bërë thirrje gazetarëve investigativë që të verifikojnë origjinën dhe destinacionin e tyre.

ARBEN AHMETAJ: Shiheni një çikë këtë rastin ku në Itali është kapur një furgon me raketa lufte. Shiheni një çikë. Se mund të zbuloni mbrapa gjëra shumë interesante. Shiheni një çikë, nuk është pa gjë.

Ahmetaj tha se bëhet fjalë për raketa të kapura nga autoritetet italiane në jug të Italisë, të cilat, sipas informacionit që ai pretendon se disponon, vinin nga Greqia dhe kishin lidhje me Shqipërinë.

Të gjitha këto deklarata janë pjesë e pretendimeve dhe akuzave të bëra nga Arben Ahmetaj gjatë intervistës dhe kërkojnë verifikim të pavarur nga institucionet përgjegjëse dhe burime të tjera.