Zëdhënësi i qeverisë greke, Pavlos Marinakis, ka hedhur poshtë pretendimet që lidhin ish-ambasadoren amerikane në Greqi, Kimberly Guilfoyle, me interesat e biznesit që lidhen me Korridorin Vertikal, rrugën e transportit të gazit natyror nga Trakia drejt vendeve të Ballkanit Lindor dhe Ukrainës. Ai theksoi se planet për këtë projekt i paraprijnë mandatit të saj, shkruan Ekathimerini.
Sipas Marinakis, planet bazë për projektin ishin hartuar disa vite më parë, ndërsa procedurat kishin nisur gjatë mandatit të ish-ambasadorit amerikan Geoffrey Pyatt dhe kishin përparuar ndjeshëm përpara mbërritjes së Guilfoyle në Greqi.
Marinakis iu referua gjithashtu deklaratave të zyrtarëve amerikanë mbi rëndësinë strategjike të projektit, si dhe pranisë së kompanive energjetike Chevron dhe ExxonMobil, si dëshmi të bashkëpunimit të ngushtë energjetik mes Greqisë dhe Shteteve të Bashkuara.
Guilfoyle u largua së fundmi nga posti i ambasadores amerikane në Greqi, në një kohë kur ndaj saj janë ngritur akuza për sjellje të pahijshme. Raportime të bazuara në një seri mesazhesh tekstuale pretendonin se ajo i kishte kërkuar një burri, i cili po kërkonte ndihmë nga administrata Trump, t’i transferonte 100 mijë dollarë. Ajo i ka mohuar akuzat për shkelje.
Gjatë një interviste për Mega News Radio, Marinakis tha gjithashtu se kishte pyetur ministrin e Energjisë, Stavros Papastavrou, lidhur me raportimet se Guilfoyle kishte kërcënuar qeverinë greke. Sipas tij, si Papastavrou, ashtu edhe zëvendësministri i Transportit, Konstantinos Kyranakis, e kishin siguruar se nuk ishte bërë asnjë kërcënim.
“As qeveria dhe as ndonjë prej ministrave të saj nuk ka pranuar ndonjë kërcënim dhe as nuk mund ta pranonte një të tillë”, deklaroi Marinakis, duke shtuar se qeveria nuk do të komentonte pretendimet e tjera të përfshira në raportime.
I pyetur për publikimin e mundshëm të regjistrimeve audio që pretendohet se përfshijnë Guilfoyle, ai shmangu spekulimet, duke thënë se fillimisht duhet të përcaktohet nëse ekzistojnë materiale të tilla dhe çfarë përmbajnë ato.
Ai shtoi se emërimi ose shkarkimi i një ambasadori është ekskluzivisht çështje e shtetit që e ka emëruar.
