Protestat e dhunshme, kryeministri francez thirrje autoriteteve rajonale të vendosin shtetrrethim të pjesshëm

Kryeministri francez, Sebastien Lecornu njoftoi të hënën se kishte udhëzuar autoritetet rajonale të vendosnin orë policore “të lokalizuara dhe të pjesshme” në mënyrë që të parandalonin trazira dhe plaçkitje të mëtejshme pas një fundjave dhune në të gjithë Francën.

Detajet e zonave që do t’i nënshtrohen orës policore do të njoftohen më vonë të hënën.

“Të shtunën, pavarësisht skenave të dhunës ekstreme dhe dëmeve të mëdha materiale, askush nuk u vra dhe kjo është një mrekulli”, tha kryeministri pas një takimi të ekipit qeveritar të reagimit ndaj krizave.

Lecornu mbrojti gjithashtu punën e oficerëve të policisë që ishin përballur me grupe protestuesish. Kjo vjen pasi presidenti francez Emmanuel Macron refuzoi të pranonte dorëheqjen e Ministrit të Brendshëm Laurent Nunez, duke përmendur nevojën për të siguruar vazhdimësinë e komandës së forcave të sigurisë duke pasur parasysh situatën aktuale.

Presidenti i ka ngarkuar ministrit të brendshëm të marrë të gjitha masat e nevojshme për të garantuar transparencë të plotë mbi dështimet në planifikim dhe inteligjencë që çuan në këtë dhunë.

Macron ka bërë thirrje gjithashtu për futjen e “taktikave të reja të policimit në terren”. Nunez tha se policia kishte “humbur kontrollin” e situatës në disa qytete.

“Një numër masash për të përmbajtur dhe parandaluar plaçkitësit dhe vandalët nga veprimi do të futen nga mbrëmja e së hënës”, njoftoi ministri i brendshëm të hënën, duke shtuar se numri i forcave të policisë dhe xhandarmërisë në terren do të forcohet më tej duke hyrë në fundjavë.

Të dielën në mbrëmje, disa grupe dolën përsëri në rrugë për t’i vënë flakën kazanëve të mbeturinave, biçikletave dhe objekteve të tjera, si dhe për të plaçkitur dyqane në qytete, përfshirë Parisin, Lionin dhe Marsejën.

Rreth 2,400 persona u arrestuan në të gjithë Francën gjatë fundjavës në lidhje me protestat, sipas autoriteteve.