Bankat e nivelit të dytë kanë marrë masa për përshtatjen e shërbimeve ndaj klientëve, duke riorganizuar përkohësisht funksionimin e disa degëve në Tiranë dhe Durrës. Ndryshimet vijnë në kushtet e situatës së krijuar gjatë ditëve të fundit, me synimin për të garantuar sigurinë e klientëve dhe punonjësve, si dhe vijimësinë e shërbimeve bankare.
Sipas njoftimeve të publikuara për datën 19 tetor, disa banka kanë zgjedhur të mbyllin përkohësisht një pjesë të degëve, ndërsa të tjera kanë përshtatur oraret e punës, duke orientuar klientët drejt pikave alternative dhe shërbimeve elektronike.
Banka Kombëtare Tregtare ka njoftuar se 12 degë në kryeqytet nuk do të ofrojnë shërbime gjatë kësaj të hëne. Kufizimet përfshijnë pika në Rrugën e Durrësit, Myslym Shyri, Stacionin e Trenit, Don Bosko dhe zona të tjera. Banka u rekomandon klientëve përdorimin e platformave të saj digjitale, të disponueshme gjatë gjithë kohës.
Edhe Raiffeisen Bank ka përshtatur organizimin e punës, duke njoftuar mbylljen e pesë degëve në Tiranë, ndërsa degët e tjera vijojnë të funksionojnë normalisht.
Intesa Sanpaolo Bank Albania ka njoftuar ndryshime në tetë degë që do të qëndrojnë të mbyllura, prej të cilave dy deri në një njoftim të dytë. Ndërkohë, pesë degë të tjera, dy në Tiranë dhe tri në Durrës, do të ofrojnë shërbime deri në orën 13:00. Banka ka sqaruar se degët e tjera vijojnë të funksionojnë sipas orarit të zakonshëm.
OTP Bank ka vendosur mbylljen e përkohshme të dy degëve dhe reduktimin e orarit në tetë të tjera, të cilat do t’u shërbejnë klientëve deri në orën 12:00. Në degët e tjera, shërbimi do të vijojë deri në orën 15:30.
Një organizim të ngjashëm ka zgjedhur edhe ABI Bank, e cila ka njoftuar se tetë degë në Tiranë do të funksionojnë deri në mesditë, ndërsa klientët mund të drejtohen në degët e tjera të bankës ose të përdorin shërbimet elektronike dhe rrjetin e ATM-ve.
Credins Bank ka reduktuar orarin në gjashtë degë, ku shërbimi do të ofrohet deri në orën 13:00, ndërsa të gjitha degët e tjera janë në shërbim të plotë.
Union Bank ka njoftuar mbylljen e tri degëve në kryeqytet, përkatësisht Shallvare, Piazza dhe Toptani. Për të lehtësuar aksesin e klientëve te paratë e gatshme, banka ka bërë të ditur se ata mund të kryejnë tërheqje pa komision në rrjetin e ATM-ve në Shqipëri, përfshirë edhe ato të bankave të tjera.
Edhe Fibank ka përshtatur funksionimin e rrjetit, duke njoftuar se degët pranë Kullave Binjake dhe Fakultetit të Shkencave do të qëndrojnë të mbyllura, ndërsa pjesa tjetër e degëve do të vijojë shërbimin normalisht.
Nga ana tjetër, ProCredit Bank ka konfirmuar se të gjitha degët dhe agjencitë e saj në Tiranë dhe në qytetet e tjera vijojnë të funksionojnë sipas organizimit të zakonshëm.
Në total, sipas njoftimeve të tetë bankave që kanë ndryshuar organizimin e punës, 33 degë janë njoftuar të mbyllura dhe 27 të tjera me orar të reduktuar. Këto shifra pasqyrojnë ndryshimet në shërbimin fizik dhe nuk nënkuptojnë ndërprerjen e aktivitetit bankar në tërësi.
Për qytetarët dhe bizneset, bankat rekomandojnë që, përpara se të paraqiten në sportele, të verifikojnë oraret e degëve përmes kanaleve zyrtare të komunikimit. Veprimet që mund të kryhen nëpërmjet aplikacioneve, internet banking dhe shërbimeve të vetëshërbimit mbeten alternativa për të shmangur lëvizjet e panevojshme.
