Klosi: Selinë e PS-së do ta mbrojmë me bandën e Rigers Sheqerit, me hunj dhe gurë, është normale!

Sekretari i Përgjithshëm i Partisë Socialiste, Blendi Klosi e konsideron normale që selia e PS-së të mbrohet edhe nga persona të administratës, në një kohë kur protesta në Tiranë është shoqëruar me përplasje mes demonstruesve dhe policisë.

I ftuar në emisionin “Top Story”, Klosi deklaroi se socialistët do të jenë sërish në mbrojtje të selisë së tyre, duke shtuar se, nëse policia nuk e kryen këtë detyrë, do ta bëjnë vetë.

Qëndrimi i tij vjen në një moment kur vëmendja është përqendruar te personat që ndodheshin brenda godinës së PS-së, mes tyre edhe drejtori i Inspektoratit të Mbrojtjes së Territorit në Bashkinë e Tiranës, Rigers Sheqeri.

Sheqeri është shfaqur në pamjet e protestës brenda selisë socialiste, me një shkop në dorë.

“Nëse nuk e bën policia, do ta bëjmë vetë”

Gjatë debatit televiziv, Klosi mbrojti qëndrimin se selia e PS-së do të mbrohet edhe në protestat e ardhshme, ndërsa gazetari Arion Sulo e sfidoi për personat që ndodheshin pranë godinës.

Përplasja në studio u zhvillua në një klimë të tensionuar, teksa Sulo ngriti shqetësimin për dhunën ndaj protestuesve dhe paralajmëroi për rrezikun e përshkallëzimit të situatës.

Sheqeri i IMT-së, brenda selisë me shkop në dorë

Gjatë protestës së djeshme, një grup të rinjsh iu afrua selisë së Partisë Socialiste dhe hodhi gurë në drejtim të godinës, duke thyer xhamin e derës kryesore.

Në pamjet e publikuara shfaqen persona pa maska brenda selisë, mes tyre Rigers Sheqeri, drejtor i IMT-së në Bashkinë e Tiranës, me një shkop në dorë.

Sipas raportimeve nga vendngjarja, kordoni policor u tërhoq disa hapa, ndërsa më pas efektivët ndërhynë me gaz lotsjellës dhe autobot me ujë për të shpërndarë protestuesit.

Turma u zhvendos më pas në zonën pranë Bankës së Shqipërisë dhe në Rrugën e Kavajës.