Reperi i njohur shqiptar, Don Xhoni, ka reaguar përmes një postimi në InstaStory lidhur me situatën në Shqipëri, duke përcjellë një mesazh për dhunën, bashkimin dhe nevojën për të gjetur një zgjidhje përmes dialogut.
Artisti iu drejtua drejtpërdrejt Shqipërisë, duke thënë se prej ditësh po sheh pamje të shumta nga ajo që po ndodh.
Ai theksoi se nuk dëshiron të mbetet indiferent ndaj situatës, ndërsa shprehu shqetësimin për atë që po sheh.
“Shqipnia jem, që sa ditë po i shoh plot video çka o tu ndodh, edhe po m’dhem mos me reagu kur po e shoh nonstop atë dhunë e atë hallakamë”, shkroi reperi.
Don Xhoni u ndal veçanërisht te dhuna, duke theksuar se ajo nuk është zgjidhje dhe se përplasjet vetëm sa mund ta përkeqësojnë situatën.
“Dhuna s’zgjedh prej asnjones anë. Me zor e me inat s’zgjidhet kurgjo, veç bohet edhe ma keq”, u shpreh ai.
Në vazhdim, reperi bëri thirrje për bashkim mes studentëve dhe institucioneve, duke theksuar rëndësinë e gjetjes së një zgjidhjeje të përbashkët.
“Mos harroni që n’fund t’ditës na jem njo! Institucionet bohen prej qytetarëve, e jo qytetarët prej institucioneve”, përfundoi Don Xhoni.