Kryeministri i Holandës, Rob Jetten, ka njoftuar se ai dhe partneri i tij do të bëhen prindër për herë të parë në pranverën e ardhshme, nëpërmjet një nëne surrogate dhe një dhurueseje të vezës. “Një person shumë i veçantë është rrugës. Shihemi në vitin 2027, vogëlush”, shkroi Jetten në llogarinë e tij personale në Instagram, duke shoqëruar postimin me emoji që simbolizojnë një foshnjë dhe një shishe qumështi. Kryeministri holandez shprehu gjithashtu mirënjohjen për dhuruesen e vezës, nënën surrogate dhe familjet e tyre, duke theksuar se pa ndihmën e tyre, ky moment nuk do të ishte i mundur.
“Fjalët nuk mjaftojnë për t’ju falënderuar”, shkroi ai në mesazhin e tij. Sipas njoftimit, çifti pret të mirëpresë fëmijën e tyre të parë në pranverën e vitit 2027. Rob Jetten është i fejuar me lojtarin argjentinas të hokejit, Nicolás Keenan (në të majtë të fotos). Çifti kishte planifikuar të martohej këtë verë, por vendosi ta shtyjë dasmën pak kohë pasi Jetten mori detyrën e kryeministrit në fillim të këtij viti. Politikani 39-vjeçar u bë kryeministri më i ri në moshë në historinë e Holandës, pas fitores së papritur të partisë së tij, D66, në zgjedhjet e zhvilluara një vit më parë.
Nëna surrogate dhe dhuruesja e vezës janë dy mike holandeze të çiftit, të cilat kanë tashmë fëmijët e tyre dhe nuk kanë pasur asnjë motiv financiar për të ndihmuar, bëri të ditur partia D66 në një njoftim të publikuar në faqen e saj zyrtare. Partia e kryeministrit holandez, Rob Jetten, sqaroi se shtatzënia, e realizuar përmes procedurave të avancuara mjekësore, është plotësisht në përputhje me rregullat dhe legjislacionin holandez. Procesi u bë i mundur falë shërbimeve të fekondimit in vitro (IVF) që ofrohen në vend. Sipas D66, Jetten do të marrë disa ditë pushim pas lindjes së foshnjës, në mënyrë që të qëndrojë pranë familjes së tij. Megjithatë, ai nuk planifikon të marrë një leje prindërore më të gjatë.
