Protesta studentore është zhvendosur sërish në bulevardin “Dëshmorët e Kombit”, përpara Kryeministrisë, pas përplasjeve të regjistruara pranë Ministrisë së Arsimit.

Situata u tensionua pasi disa protestues hodhën gurë dhe fishekzjarrë në drejtim të policisë, ndërsa efektivët ndërhynë me autobotë uji dhe gaz lotsjellës për shpërndarjen e turmës.

Në ditën e tetë të protestave, pjesëmarrësit vijojnë të kërkojnë largimin e kryeministrit Edi Rama. Thirrjes së tij për dialog, protestuesit iu përgjigjën duke hedhur karriget e vendosura përpara Kryeministrisë.

Më herët, pranë Ministrisë së Arsimit ishte krijuar një kordon policor. Fillimisht, situata u karakterizua nga përplasje verbale mes protestuesve dhe efektivëve.

Më pas, tensionet u përshkallëzuan, duke bërë që forcat e rendit të ndërhynin me ujë dhe gaz lotsjellës për të shpërndarë turmën dhe për të rivendosur kontrollin.

Protesta vijon nën masa të shtuara sigurie, ndërsa situata mbetet e tensionuar në zonën përreth Ministrisë së Arsimit dhe në bulevardin përpara Kryeministrisë.

Pedagogët i bashkohen protestës së studentëve, Sindikata e Universiteteve shpall bojkotin: Do jemi çdo ditë në shesh

Protestës së studentëve i janë bashkuar edhe pedagogët dhe Sindikata e Punonjësve të Universiteteve të Shqipërisë (SPUSH).

Pedagogët dhe studentët janë mbledhur para Kryeministrisë, ku kanë refuzuar thirrjen e kryeministrit Edi Rama për dialog. Ata kanë larguar nga sheshi edhe karriget e vendosura nga kreu i qeverisë, të cilat simbolizonin uljen në tryezë dhe gjetjen e një zgjidhjeje përmes dialogut.

Sindikata e Punonjësve të Universiteteve të Shqipërisë ka shpallur grevë në formën e bojkotit, ku sipas kreut të saj, Sandër Kovaçi mbledhjet do të zhvillohen në shesh çdo ditë, duke nisur nga ora 10:00. Pas mbledhjeve, sindikalistët do të vijojnë marshimin dhe do të ndalen përpara Kryeministrisë.

Gjatë protestës, pedagogu Kovaçi kritikoi qeverisjen dhe mungesën e llogaridhënies, duke theksuar se vendi ka humbur shumë kohë dhe kërkoi që politika të gjejë zgjidhjen për krijimin e një Shqipërie evropiane.

“Njerëzit i kanë lënë kryeministrit 13 vite kohë për të ndryshuar gjendjen, por ajo ka shkuar gjithmonë e më keq. Të mos dëgjosh popullin tënd është problem. Kjo ndodh sepse në Shqipëri nuk ka votë të lirë nga populli, por votë të manipuluar, përmes shantazhimit të administratës. Për sa kohë që vota nuk është e lirë, nuk ka llogaridhënie. Drejtuesit e universiteteve dhe pedagogët duhet të jenë në krah të studentëve. Jemi në një situatë absurde dhe kjo duhet të zgjidhet. Politika duhet të gjejë një zgjidhje dhe të ndërtojë një Shqipëri evropiane, ndryshe nga ajo që kemi sot. Kemi 36 vite që humbim kohë kot”, u shpreh ai.

Pedagogët u mblodhën në sheshin para Universitetit Politeknik të Tiranës, në shenjë solidariteti me studentët protestues.

Gazetarja Elda Lamja raportoi se punonjësit dhe pedagogët e universiteteve në të gjithë vendin kanë bërë thirrje për t’iu bashkuar protestës, duke theksuar se qëndrojnë në mbështetje të studentëve që prej ditës së parë të tubimit.

Përmes një slogani të tyrin, “Stop dhunës ndaj studentëve”, pedagogët kanë shprehur solidaritetin me të rinjtë.

“Jemi kundër dhunës së policisë dhe në solidaritet të plotë me studentët. Sot jemi në një situatë që duhet zgjidhje, dhe kjo zgjidhje duhet të vijë nga politika”, u shprehën pedagogët.

Rama i ftoi për dialog, protestuesit rrëzojnë karriget para Kryeministrisë. Drejtoresha e MIA: Kryeministri i ka dyert e hapura

Vendosja e karrigeve para Kryeministrisë nga kreu i qeverisë, Edi Rama, me thirrjen për dialog drejtuar studentëve, nuk është pranuar nga protestuesit. Këta të fundit janë ngritur në protestë, duke kërkuar dorëheqjen e kryeministrit.

Protestuesit kanë thyer karriget e vendosura para godinës së Kryeministrisë, duke deklaruar se nuk pranojnë dialogun e propozuar.

Në një reagim ndaj studentëve, drejtoresha e Agjencisë për Media dhe Informim, Manjola Hasa, u shpreh se kryeministri Edi Rama është i gatshëm të zhvillojë dialog pa kushte me ta.

“Jam këtu nëse doni të dialogoni me kryeministrin. Nuk jam këtu për të bërë asnjë deklaratë politike. Nuk jam këtu të flas as për reagimet e studentëve dhe as për reagimet e çdo qytetari që ka të drejtë të protestojë. Unë jam këtu nisur nga ftesa e haour për dialog e kryeministrit, realisht kush është i interesuar të bëjë dialog, të vijë me mua te kryeministri. Nëse mes tyre ka studentë, të rinj, qytetarë që janë të interesuar të dialogojnë, unë jam këtu për t’i përcjellë këto kërkesa. Nëse keni shqetësime, hajde shkojmë bashkë te kryeministri. Kryeministri i ka dyert e hapura”, deklaroi Hasa.

Protestës së studentëve i është bashkuar edhe një grup pedagogësh, në shenjë mbështetjeje për të rinjtë dhe kërkesat e tyre

/rtsh.al/