Kryetari i Grupit Parlamentar të Partisë Socialiste, Taulant Balla, bëri thirrje për dialog me studentët, duke theksuar se qeveria dhe Kryeministri kanë ofruar tryezën e bisedimeve për të diskutuar kërkesat e tyre. Ai u shpreh se studentët meritojnë të dëgjohen dhe se tashmë është koha për një Pakt të ri për Universitetin (Paktin 2.0). Balla nënvizoi nevojën për përmirësim të kushteve në konvikte dhe bëri të ditur se ditën e enjte në Kuvend do të votohet një marrëveshje me Republikën Federale Gjermane dhe KfË-në për më shumë investime në këtë drejtim.
Në fjalën e tij, Balla paralajmëroi se karriget për dialog janë vendosur në bulevard dhe se studentët duhet të zgjedhin përfaqësuesit e tyre; Kryeministri dhe Ministrja e Arsimit janë të gatshëm të ulen për bisedime. Ai sqaroi gjithashtu se axhenda parlamentare vijon në mënyrë intensive, me ligje që duhet të miratohen brenda afateve të fundit të këtij muaji, të lidhura me procesin e negociatave dhe kërkesat e Komisionit Evropian.
Balla dënoi ashpër dhunën gjatë protestave në Tiranë, sulmet ndaj Policisë së Shtetit dhe dëmtimin e institucioneve dhe bizneseve. Ai theksoi se Grupi Parlamentar i Partisë Socialiste dënon dhunën dhe që goditja ndaj punonjësve të policisë përbën vepër penale, duke kujtuar eksperiencën e tij si ish-Ministër i Brendshëm. Sipas tij, në Shqipëri, në dallim nga vendet e tjera, pjesa më e madhe e personave të lënduar që janë paraqitur në spital janë punonjës policie. Balla shprehu shqetësim edhe për pjesëmarrjen e të miturve në protesta, duke e cilësuar përgjegjësi të prindërve që fëmijët të mos përfshihen në akte dhune apo të përdoren për qëllime politike.
Sa i përket arsimit, ai deklaroi se lajmi i mirë është vazhdimi i mësimit në të gjitha shkollat. Në përfundim, Balla e konsideroi sulmin ndaj institucioneve një ngjarje të rëndë dhe theksoi se godina e sulmuar nuk ishte përballur me një situatë të tillë as në vitet 1997 dhe 1998.