Përfaqësuesja e Lartë e Bashkimit Evropian për Politikën e Jashtme, Kaja Kallas, ka paralajmëruar për rrezikun e një krize të re globale ushqimore, duke vënë në dukje ndikimin e ndryshimeve klimatike, konflikteve ndërkombëtare dhe sulmeve ruse ndaj eksporteve bujqësore të Ukrainës.

Gjatë një fjalimi para eurodeputetëve në Strasburg, Kallas deklaroi se sistemi global i furnizimit me ushqime po përballet me një kombinim faktorësh që mund të sjellin pasoja serioze në tregjet ndërkombëtare.

Sipas saj, thatësirat në të dyja hemisferat, konflikti në Lindjen e Mesme dhe fenomeni klimatik “El Niño” po shtojnë rreziqet për prodhimin dhe furnizimin me ushqime. Situata rëndohet më tej nga sulmet ruse ndaj infrastrukturës bujqësore dhe rrugëve të eksportit të Ukrainës.

Kallas akuzoi Rusinë për sulme ndaj porteve në Detin e Zi dhe Danub, pikave kufitare, objekteve të eksportit, anijeve dhe depove të magazinimit të drithërave.

Ajo paralajmëroi gjithashtu se gjashtë sulme me dronë, që sipas saj dyshohet se janë kryer nga Rusia brenda një periudhe dhjetëditore në rajonin e Detit të Zi, përbëjnë një përshkallëzim shqetësues.

Sipas Kallas, çmimet ndërkombëtare të grurit kanë arritur nivelin më të lartë që nga shkurti i vitit 2023, pavarësisht se rezervat globale janë më të mëdha se në vitet e mëparshme.

Duke theksuar rëndësinë e Ukrainës në tregun botëror të produkteve bujqësore, përfaqësuesja e BE-së tha se rreth 90% e eksporteve të saj transportohen përmes Detit të Zi. Për këtë arsye, ajo kërkoi zgjerimin e korridoreve alternative për transportin e produkteve ukrainase.

Kallas bëri gjithashtu thirrje për forcimin e mbikëqyrjes dhe mbrojtjes ndaj kërcënimeve ajrore e detare, si dhe për vijimin e përpjekjeve diplomatike në bashkëpunim me vende si Turqia dhe India, me synim garantimin e sigurisë ushqimore globale.