REUTERS
Prokurorët në Shqipëri kanë zyrtarizuar akuzat për korrupsion ndaj ish-zëvendëskryeministres Belinda Balluku, aktakuza fillestare ndaj së cilës, një vit më parë, shkaktoi trazira në Tiranë.
Balluku, e cila shërbeu si zëvendëse e kryeministrit Edi Rama dhe gjithashtu si ministre e Infrastrukturës, u akuzua në fund të vitit të kaluar për ndërhyrje në dhënien e dy kontratave të ndërtimit në vitin 2021, me vlerë mbi 200 milionë euro (225 milionë dollarë).
Korrupsioni në institucionet publike ka qenë një nga faktorët që kanë nxitur këtë muaj protesta të reja të udhëhequra nga studentët dhe trazira në kryeqytetin Tiranë, ku protestuesit kërkojnë dorëheqjen e Ramës.
Të martën, protestuesit u mblodhën përpara një ndërtese të Ministrisë së Arsimit, duke brohoritur: “Balluku në burg!”. Policia i zmbrapsi duke përdorur topa uji dhe gaz lotsjellës.
Balluku, 53 vjeçe, nuk ka bërë asnjë koment publik që kur mohoi shkeljet, në përgjigje të akuzave fillestare. Rama e shkarkoi atë në shkurt, por një përpjekje për t’i hequr imunitetin parlamentar, i cili e mbron nga arrestimi, dështoi. Ajo nuk iu përgjigj një kërkese për koment të martën.
Në një deklaratë me email drejtuar mediave, Prokuroria e Posaçme, e cila merret me korrupsionin në nivele të larta, tha se akuzat përfundimtare ndaj Ballukut përfshijnë shkeljen e barazisë së pjesëmarrësve në tenderët ose ankandet publike, si dhe korrupsionin pasiv të personave, përfshirë zyrtarë të lartë shtetërorë.
Ajo u akuzua gjithashtu për pastrim të të ardhurave që burojnë nga veprimtari kriminale.
“Prokuroria e Posaçme po vijon të ndërmarrë hapa konkretë proceduralë për t’ua komunikuar zyrtarisht akuzat edhe personave të tjerë të përfshirë në të njëjtin çështje penale”, thuhej në deklaratë.
Rama, i cili ka refuzuar të japë dorëheqjen, e ka dënuar dhunën. Ai tha se qeveria do të shqyrtojë uljen e moshës së përgjegjësisë penale dhe vendosjen e një ndalimi të përdorimit të rrjeteve sociale për personat nën 16 vjeç, si masa për t’iu kundërvënë protestave.
