Itali, deri në 12 vite burg për organizimin e protestave të dhunshme përmes platformave digjitale

Qeveria italiane ka parashikuar dënime nga 4 deri në 12 vite burg për personat që nxisin apo promovojnë krijimin e grupeve për organizimin e demonstratave të dhunshme, edhe kur kjo bëhet përmes kompjuterëve dhe mjeteve të tjera elektronike.

Masa është bërë e ditur nga Ministri i Drejtësisë, Carlo Nordio, pas mbledhjes së kabinetit qeveritar në Palazzo Chigi, në kuadër të një dekreti të ri për sigurinë urbane.

Gjatë deklaratës për mediat, Nordio shpjegoi se legjislacioni i ri synon të parandalojë organizimin e akteve të dhunshme përmes hapësirave virtuale, duke përfshirë platformat digjitale që përdoren për koordinimin e protestave.

“Ekziston një krim i veçantë i dënueshëm me katër deri në dymbëdhjetë vjet burg për këdo që, edhe përmes kompjuterit ose mjeteve elektronike, promovon formimin e një grupi” për organizimin e “demonstrimeve të dhunshme”, deklaroi ministri.

Përmes kësaj ndërhyrjeje, përgjegjësia penale synon të përfshijë jo vetëm personat që marrin pjesë drejtpërdrejt në akte dhune gjatë protestave, por edhe ata që kontribuojnë në organizimin dhe nxitjen e tyre përmes komunikimit online.

Dekreti vjen në një kohë kur rrjetet sociale dhe aplikacionet e mesazheve përdoren gjerësisht për koordinimin e tubimeve dhe mobilizimin e pjesëmarrësve. Sipas masave të prezantuara nga qeveria italiane, organizimi i demonstratave të dhunshme përmes këtyre kanaleve mund të sjellë pasoja të rënda penale.