Kreu i Partisë Demokratike, Sali Berisha, ka akuzuar kryeministrin Edi Rama se ka tentuar të sulmojë selinë e PD-së përmes forcave të policisë, duke pretenduar se ndërhyrja u krye për të krijuar një argument për narrativën e tij se protestat kundër qeverisë janë të nxitura nga grupe anarkiste.
Gjatë një mbledhjeje me drejtuesit e degëve të PD-së në Tiranë, Berisha deklaroi se Rama kishte dështuar në dy tentativa për të sulmuar selinë e opozitës.
“E patë ju, Edi Rama donte të sillte këtu për të sulmuar selinë agjentë të policisë kriminale të shndërruar në një amalgamë me ekstremistët e majtë. Dështoi! Tentoi dy herë dhe dështoi.
Dhe në fund në shkelje flagrante të Kushtetutës dhunoi selinë duke futur narkobanditë me uniformë. Vetëm e vetëm, edhe njëherë, vetëm e vetëm që të justifikojë, të argumentojë tezën e tij të rreme se kjo është një ANTIFA, se këta nuk e kanë hallin tek korrupsioni i tij, tek vjedhjet e tij, tek droga, tek zgjedhjet, tek farsa elektorale, por këta janë anarkistët e shkatërrimit”, tha Berisha.
