Hyrja e saj në shoqërinë e lartë athinase ishte një vorbull festash VIP dhe miqësish të shpejta me miliarderë e madje edhe me një yll grek të muzikës pop.
Por disa prej figurave të rëndësishme që e mirëpritën Kimberly Guilfoyle, 57 vjeçe, kur ajo mbërriti në Greqi si ambasadore e SHBA-së në fund të vitit të kaluar, tani duket se po distancohen prej saj pas largimit të saj të turpshëm nga detyra, thanë burime për Daily Mail.
Dhe ndërsa rrethi i saj shoqëror plot shkëlqim po hesht, në rezidencën e saj zyrtare në lagjen luksoze “Kolonaki” të Athinës kanë mbetur vetëm disa gjurmë të jetës së saj dikur magjepsëse diplomatike.
Të premten e javës së kaluar, një furgon i pastrimit kimik u ndal para Jefferson House për të dorëzuar një koleksion fustanesh dhe një çantë të madhe Saint Laurent, së bashku me një zarf të bardhë misterioz.
Kjo dërgesë ofroi një vështrim mbi jetën pas mureve të rezidencës, ndërsa shtohen pyetjet se kur Guilfoyle do largohet nga Greqia, pas dorëheqjes së saj të papritur, vetëm 11 muaj pasi kishte marrë detyrën.
Disa nga figurat e pasura dhe me lidhje të forta, të cilat dikur e pritën ngrohtësisht Kimberly Guilfoyle-in me mbërritjen e saj në Greqi, tani po mbajnë distancë, bëjnë të ditur burime për “Daily Mail”. Ajo shfaqet duke shijuar jetën e natës në Athinë, pak kohë pasi u emërua Ambasadore e SHBA-së në Greqi, në nëntor të vitit 2025
“Kur mbërriti, ishte jashtëzakonisht argëtuese dhe disa emra shumë të mëdhenj u bënë shpejt pjesë e rrethit të saj”, i tha Daily Mail një personazh i shoqërisë së lartë greke, i afërt me rrethin e ngushtë grek të Guilfoyle.
“Këta njerëz e trajtonin si një perëndeshë, por bie në sy fakti se tani nuk po bëjnë asnjë deklaratë në mbështetje të saj. Kanë frikë. Kjo histori do vazhdojë të zvarritet, ndaj askush nuk dëshiron që edhe emri i tij të përfshihet në të, edhe nëse është një miliarder, reputacioni dhe pozita e të cilit janë shumë më të forta se të sajat.”
Një nga këto lidhje ishte ajo me këngëtarin e pashëm të muzikës pop, Konstantinos Argiros, 40 vjeç, i cili ishte pothuajse vazhdimisht i pranishëm në atë që quhej “diplomacia e klubeve të natës” e Guilfoyle në Athinë, pasi organizoi festën e saj të mirëseardhjes me shumë personazhe të njohur në nëntor 2025.
Nuk dihet saktësisht se kur u takuan për herë të parë të dy. Por miqësia e tyre u vu në qendër të vëmendjes disa javë përpara se Guilfoyle të merrte detyrën, kur Argiros e tërhoqi atë në skenë gjatë mbrëmjes gala të organizatës bamirëse Hellenic Initiative në Londër, për të kërcyer nën ritmet e këngës së tij hit “Mallon Kati Ksero”.
Miqësia e saj me Argirosin u bë për herë të parë kryetitull në një mbrëmje gala bamirësie në Londër për “The Hellenic Initiative” në tetor të vitit 2025, kur ajo u thirr në skenë për të kërcyer me artistin gjatë performancës së tij
Në dhjetor 2025, ai i tha emisionit grek “Enopios Enopio” (Ballë për Ballë):
“U njohëm përmes dëshmitarit tim të nderit në dasmë…U njohëm më mirë dhe atëherë kuptova se sa sinqerisht dëshiron ajo të ndihmojë gjithë botën. Ajo është jashtëzakonisht bujare. Ajo që më bëri përshtypje ishte mënyra se si kujdesej për njerëzit përreth saj. Atëherë më fitoi si person, pa e njohur politikisht. Më bindi në këtë mënyrë. Më vonë zhvilluam një marrëdhënie më të afërt; ajo takoi familjen time dhe unë takova familjen e saj. Kjo është lidhja që ndajmë.”
Por këtë javë, qëndrimi i tij ishte disi ndryshe, pas dorëheqjes së Guilfoyle për shkak të pretendimeve se ajo i kishte kërkuar donatorit republikan Eric Deters 100 mijë dollarë për të shlyer faturën e saj të American Express, krahas shqetësimeve të tjera etike. Guilfoyle i mohon akuzat.
Argiros, i cili është i martuar, duket se shmangu qëllimisht mundësinë për të mbrojtur Guilfoyle-n, kur një gazetar i televizionit grek e pyeti për të.
“Nuk e kam ndjekur të gjithë këtë çështje. Nuk i di hollësitë”, këmbënguli Argiros në Aeroportin Ndërkombëtar të Athinës, teksa përgatitej të nisej për një turne koncertesh.
“Nuk po them asgjë. Nëse dëshironi të flas për muzikën, jam më se i gatshëm.”
Guilfoyle u bë shpejt mike me këngëtarin grek simpatik Konstantinos Argiros, 40 vjeç (në foto), pasi ai organizoi një festë mirëseardhjeje plot yje për të në nëntor të vitit 2025
Edhe vjehrra e Argiros, Miranda Patera, një figurë me peshë në rrethet e shoqërisë së lartë të Athinës dhe pjesëtare e një familjeje të njohur të industrisë së transportit detar, dukej se po distancohej këtë javë. Mediat greke kanë raportuar gjerësisht se Guilfoyle mund të bëhej kumbara e foshnjës së porsalindur të vajzës së saj, Alexandra, dhe këngëtarit.
Kur Argiros u filmua duke dalë nga një maternitet në qershor, ai nuk i mohoi pyetjet lidhur me këtë mundësi.
Por, kur një gazetar i bëri të njëjtën pyetje Paterës këtë javë, ajo shmangu komentet.
Kur u pyet më tej, ajo tha se nuk kishte pasur asnjë marrëveshje të tillë lidhur me rolin e mundshëm të Guilfoyle në jetën e vajzës së vogël.
Në botën e ndërthurur të shoqërisë së lartë greke, Argiros dhe bashkëshortja e tij, Alexandra, kanë marrëdhënie shumë të afërta me stilisten Celia Kritharioti dhe bashkëshortin e saj, manjat të industrisë së transportit detar, Nikolas Tsakos.
Ironikisht, ishte pikërisht afërsia e Guilfoyle me Tsakos që çoi në akuzat për shkelje etike ndaj saj, për shkak të udhëtimeve me avionët e tij privatë, dhe më pas në rënien e saj.
Kimberly Guilfoyle, magnati grek i transportit detar Nikolas Tsakos dhe modelja Carla Bruni në Javën e Modës në Paris, në janar
Ajo kaloi Krishtlindjet dhe Vitin e Ri me familjen Tsakos në resortin luksoz zviceran të Gstaadit, ndërsa manjati thuhet se pagoi gjithashtu akomodimin e Guilfoyle në hotelin me pesë yje “Four Seasons George V” në Paris.
Në një regjistrim audio të rrjedhur në publik, Guilfoyle dëgjohet duke përshkruar marrëdhënien e tyre të ngushtë:
“E takoj Nikosin çdo ditë…ai më do. Zemër, i kalova Krishtlindjet me të.”
Daily Mail i është drejtuar Tsakos për një koment lidhur me rënien e Guilfoyle nga pozita e saj e privilegjuar.
Ndërkohë, reagimet negative në rrethet e shoqërisë së lartë vazhdojnë, pasi një botues i njohur grek kritikoi publikisht stilisten Celia Kritharioti për lidhjet e saj me Guilfoyle.
Stathis Tsagkarousianos, drejtues i revistës athinase LiFO, iu drejtua stilistes në një letër të hapur, duke e pyetur:
“Nga të gjithë njerëzit që mund të kishe zgjedhur, çfarë gjete konkretisht te Guilfoyle që lidhet me elegancën? A është ky person modeli yt ideal për të ndikuar te publiku?”
Guilfoyle, 57 vjeçe, u pa duke festuar në Mikonos me ambasadorin e SHBA-së në Belgjikë, Bill White, në muajin korrik
Ndërkohë, një burim tjetër i tha Daily Mail:
“Kur mbërriti Kimberly, njerëzit bënin gjithçka për të bërë një fotografi me të. Të gjithë donin të përfitonin nga afërsia me të. Ajo u bë një emër i njohur edhe për grekun e zakonshëm, aq i madh ishte ndikimi i saj. Të gjithë e njihnin thjesht si ‘Kimberly’. Ajo kishte diçka nga fama e një ylli të muzikës pop. Tani, për shumë njerëz, ajo është një person i padëshiruar.”
Megjithatë, në disa qarqe, Guilfoyle po gjykohet me më shumë mirëkuptim.
Një tjetër manjat i industrisë së transportit detar i tha Daily Mail:
“Po i jap pak kohë që të mbledhë mendimet dhe të përballet me atë që po ndodh, përpara se ta kontaktoj. Ne flasim rregullisht. Ajo bëri mrekulli për marrëdhëniet greko-amerikane. Sigurisht, ajo u përfshi në situata të vështira dhe u soll ndryshe nga çdo ambasador tjetër, por në fund u bë shumë më e afërt dhe njerëzore për grekët.”
Daily Mail ka kontaktuar ambasadën amerikane në Athinë për një koment, por përfaqësuesit e saj refuzuan të japin detaje lidhur me datën e pritshme të largimit të Guilfoyle apo vendndodhjen e saj aktuale.
VINI RE: Ky material është pronësi intelektuale e Daily Mail
