Albpetrol shpall fituesit për 101.4 mijë ton naftë, kontrata vlerësohet 61.4 milionë euro

Kompania shtetërore Albpetrol ka shpallur fitues bashkimin e operatorëve ekonomikë “Europetrol Durrës Albania” dhe “Bitex Refinery” në ankandin për shitjen e 101.4 mijë tonëve naftë bruto.

Vlera e përllogaritur e kontratës arrin në 5.57 miliardë lekë, ose rreth 61.4 milionë euro, sipas dokumentacionit të publikuar nga kompania.

Në njoftimin e fituesit, të datës 19 tetor 2026, Albpetrol përcakton se dy kompanitë duhet të paraqesin një sigurim kontrate prej 557.3 milionë lekësh. Kjo shumë përfaqëson 10% të vlerës së përllogaritur të kontratës, duke e çuar vlerën totale të parashikuar të shitjes në 5.57 miliardë lekë.

Shuma përfaqëson vlerën e përllogaritur të të ardhurave nga ankandi dhe jo një shumë tashmë të arkëtuar. Vlera përfundimtare e shitjes do të përcaktohet nga çmimet ndërkombëtare të naftës gjatë periudhës së zbatimit të kontratës.

Kushtet e ankandit

Sipas dokumenteve të Albpetrol, bashkimi i kompanive “Europetrol Durrës Albania” dhe “Bitex Refinery” ka rezultuar fitues me një ofertë të bazuar në 77.51% të çmimit të naftës Brent, minus 4.448 dollarë për fuçi, plus një koeficient shtesë “K” prej 0.0105 dollarësh për fuçi, pa TVSH.

Koeficienti “K” ishte elementi konkurrues i ankandit, ndërsa çmimi bazë i shitjes ishte përcaktuar paraprakisht nga Albpetrol. Sipas kushteve të procedurës, fitues do të shpallej operatori që ofronte vlerën më të lartë të këtij koeficienti.

Albpetrol e hapi ankandin në fillim të tetorit, duke nxjerrë në shitje 101,400 ton naftë bruto, me një periudhë lëvrimi prej 12 muajsh nga nisja e tërheqjes së produktit.

Sasia e naftës nuk do të tërhiqet menjëherë, por do të shpërndahet gjatë një viti, me nga 8,450 ton në muaj. Produkti ndodhet në gjashtë pika të administruara nga Albpetrol: Zharrëz, Usojë, Visokë, Gorisht, Kuçovë dhe Amonicë.

Çmimi që do të paguajnë kompanitë fituese nuk është fiks, por do të ndryshojë në varësi të kuotimeve të naftës Brent në tregjet ndërkombëtare. Për llogaritjen e tij do të përdoren referencat e publikuara nga Platts.

Përqindja prej 77.51% e çmimit Brent është përcaktuar nga Albpetrol duke marrë parasysh karakteristikat e naftës bruto që tregtohet, përfshirë densitetin dhe përmbajtjen e squfurit. Ndërsa zbritja prej 4.448 dollarësh për fuçi lidhet me kostot e transportit, magazinimit, stokimit, analizimit dhe sigurimit të produktit, në rastet kur ai merret drejtpërdrejt në pikat e lëvrimit.

Pagesat nga kompanitë fituese do të kryhen përpara tërheqjes së çdo sasie mujore, përmes transfertave bankare, sipas grafikut të përcaktuar në kontratë.

Ky është ankandi i parë i zhvilluar nga Albpetrol gjatë vitit 2026, pas procedurës së mëparshme për shitjen e naftës bruto në shtator 2025./ N.Maho