Rreth 1.3 mijë studentë të huaj në universitetet shqiptare, kryesojnë italianët dhe indianët

Ardhja e shtetasve të huaj në Shqipëri për qëllime studimi kryesohet nga italianët dhe indianët.

Deri në qershor 2026, sipas të dhënave të Policisë së Shtetit për Monitor, numri i të huajve të pajisur me leje qëndrimi në vend arriti në 38,712 shtetas të huaj.

Nga totali i lejeve aktive për shtetasit e huaj deri në qershor 1,261 leje apo 3.2% janë për qëllime studimi.

Të huajt në Shqipëri arrijnë rekordin e gati 39 mijë shtetasve, 60% e tyre për të punuar

Sipas të dhënave, shtetasit italianë kryesojnë jo vetëm për numrin më të lartë të të vetëpunësuarve, por edhe për qëndrimin në Shqipëri për arsye studimi. Për këtë kategori, lejet e qëndrimit kryesohen nga shtetasit italianë, me 462 leje, të cilat përbëjnë rreth 37% të totalit të lejeve të qëndrimit për qëllime studimi.

Rekord punësimi i të huajve, arrin 22,7 mijë shtetas; 50% e tyre nga Filipinet, India dhe Egjipti

Pas tyre renditen shtetasit indianë, me 426 leje qëndrimi për qëllime studimi apo duke përbërë rreth 34% të totalit të kësaj kategorie.

Së bashku, shtetasit italianë dhe indianë përbëjnë rreth 71% të të gjitha lejeve të qëndrimit për qëllime studimi në Shqipëri deri në qershor 2026.

Pas tyre renditen shtetasit turq, me 64 leje qëndrimi për studime, ose rreth 5.1% të totalit. Më pas vijnë shtetasit francezë me 28 leje, duke përbërë rreth 2.2% të totalit, ndërsa shtetasit e Maqedonisë së Veriut kanë 18 leje, ose rreth 1.4%.

Ndër shtetësitë me numër më të lartë të lejeve për studime renditen edhe Kirgistani me 13 leje, Gjermania me 12, Kazakistani me 10, Nigeria me 9, ndërsa Afganistani dhe Spanja kanë nga 8 leje secila.
Polonia regjistron 6 leje, ndërsa Holanda dhe Kameruni nga 5 leje. Rusia, Serbia, Libia dhe Palestina kanë nga 4 leje secila.

Me nga 3 leje qëndrimi për studime renditen Austria, Azerbajxhani, Bosnje-Hercegovina, Bullgaria, Kina, Anglia, Rumania, Siria dhe Ukraina. Ndërkohë për shumë shtete europiane, si Greqia, Belgjika, Suedia, Zvicra apo SHBA etj kanë nga 2 leje secila. / D.Azo