Presidenti ukrainas, Volodymyr Zelensky, ka bërë të ditur se SHBA-të kanë rifilluar ndarjen e informacioneve të inteligjencës me Kievin për sulmet me raketa ruse. Njoftimi vjen pas takimit të tij me të dërguarin amerikan Steve Witkoff në Norvegji, ndërsa ky i fundit pritet të takohet me presidentin rus Vladimir Putin për të diskutuar mundësitë e përfundimit të luftës.

Zelensky deklaroi të martën (20 tetor) se Ukraina po merr sërish paralajmërime paraprake për sulmet me raketa balistike, një mekanizëm që, sipas raportimeve, ishte pezulluar javën e kaluar nga Shtëpia e Bardhë.

“Tani funksionon. Është shumë mirë”, u shpreh presidenti ukrainas, duke theksuar se shkëmbimi i informacionit është jetik për mbrojtjen e civilëve dhe shpëtimin e jetëve.

“Është shumë e rëndësishme për popullin tonë, për fëmijët, të rriturit dhe civilët, sepse mund të dëgjojmë kur vijnë raketat balistike. Prandaj, i jemi mirënjohës palës amerikane”, deklaroi Zelensky.

Gjatë qëndrimit në Oslo, presidenti ukrainas deklaroi se kishte zhvilluar gjithashtu një telefonatë “pozitive” me sekretarin amerikan të Shtetit, Marco Rubio.

I pyetur nëse Ukraina po e humbte luftën për shkak të zhvillimeve të fundit në marrëdhëniet me SHBA-në, Zelensky u përgjigj se vendi i tij nuk po humbiste luftën, por po paguante një çmim të rëndë njerëzor për shkak të sulmeve ruse.

“Sigurisht që nuk po humbasim. Por po humbasim njerëz për shkak të sulmeve dhe kohës ruse. Është për të ardhur keq”, u shpreh ai.

/rtsh.al/