Një mekanizëm financiar i paligjshëm, që dyshohet se ndihmonte organizatat mafioze të pastronin para dhe të riciklonin të ardhura kriminale, u zbulua nga Guardia di Finanza në Milano dhe Monza Brianza. Hetimi u zhvillua nën koordinimin e Drejtorisë Antimafia të Prokurorisë së Milanos.
Hetuesit dyshojnë se në rrjet vepronin persona të lidhur me tri organizata kriminale: ’Ndrangheta, Camorra dhe të ashtuquajturën “Mafia e Katërt”, e lidhur me krimin e organizuar në zonën e Foggias. Operacioni përfshiu vendosjen e 30 masave të sigurisë në Itali, Spanjë e Zvicër, si dhe sekuestrimin e pasurive me vlerë mbi 21 milionë euro.
Të lidhura
None found
Sipas hetimit, përmes skemës dyshohet se janë lëshuar fatura të rreme me vlerë mbi 110 milionë euro. Po ashtu, përmes kriptomonedhave janë kryer operacione ndërkombëtare për pastrimin e 68 milionë eurove.
Autoritetet italiane e përshkruajnë strukturën si një “bankë të fshehtë” në shërbim të mafias. Ajo dyshohet se lehtësonte transferimin dhe riciklimin e shumave të mëdha, duke shfrytëzuar skema financiare ndërkombëtare dhe transaksione me kriptoasete.
Mes akuzave që po hetohen janë pjesëmarrja në organizatë kriminale, me rrethana rënduese që lidhen me favorizimin dhe përdorimin e metodave mafioze. Dosja përmban gjithashtu dyshime për mashtrim tatimor, vepra penale në fushën e falimentimit, trafik droge dhe shkelje të legjislacionit për armët.
Nga 30 personat ndaj të cilëve u vendosën masa sigurie, 16 janë dërguar në paraburgim në burg, ndërsa 14 janë lënë në arrest shtëpie.
Aksioni u zhvillua edhe në Spanjë dhe Zvicër, në kuadër të bashkëpunimit ndërkombëtar mes autoriteteve ligjzbatuese. Në të morën pjesë mbi 350 efektivë të Guardia di Finanza-s, të mbështetur nga njësi të specializuara dhe njësia I-CAN e Interpolit, e cila merret me bashkëpunimin ndërkombëtar kundër ’Ndranghetas.
Përveç masave të sigurisë, autoritetet po zbatojnë sekuestrime të pasurive me vlerë mbi 21 milionë euro. Mes tyre janë para të gatshme, llogari bankare, kriptomonedha, automjete, mjete lundruese, bizhuteri, ora luksoze dhe makina për numërimin e parave.
Hetuesit po përpiqen të zbardhin tërësisht mënyrën se si funksiononte rrjeti financiar, i cili dyshohet se ndihmonte organizatat mafioze të transferonin dhe pastronin fitimet e paligjshme përtej kufijve.
Autoritetet italiane po vijojnë punën për të përcaktuar përgjegjësinë e secilit person të përfshirë dhe për të rindërtuar lidhjet financiare të rrjetit. Të hetuarit prezumohen të pafajshëm deri në dhënien e një vendimi gjyqësor të formës së prerë.
